01.05.2026 | 11:01
Աշխատանքի շնորհիվ ենք ստեղծում նոր արժեքներ և ամրապնդում մեր երկրի տնտեսական հիմքերը․ ՀՀ նախագահ
Ղրղզստանը ցանկանում է, որ շուտափույթ ՀԱՊԿ նոր գլխավոր քարտուղար նշանակվի
Քաղաքականություն
26.03.2019 | 18:59
Ղրղզստանը, որպես Հավաքական անվտանգության պայմանագրի կազմակերպությունում նախագահող երկիր, կցանկանար, որ շուտափույթ ՀԱՊԿ նոր գլխավոր քարտուղար նշանակվեր, չնայած նրա բացակայությունը չի անդրադառնում կազմակերպության գործունեության վրա: Ինտերֆաքսին այս մասին ասել է Ղրղզստանի նախագահի աշխատակազմի արտաքին քաղաքականության բաժնի ղեկավար Դանիյար Սիդիկովը:
«Մենք, որպես նախագահող կողմ, ցանկանում ենք, որպեսզի հնարավորինս շուտ գլխավոր քարտուղար նշանակվի, որպեսզի կազմակերպությունը լիարժեք աշխատի: Այսօր գլխավոր քարտուղարի պարտականությունները կատարում է կազմակերպության ղեկավարի տեղակալ Վալերի Սեմերիկովը: Նա բավական փորձառու և լուրջ մարդ է, այդ պատճառով կազմակերպության գործունեության վրա դա ոչ մի կերպ չի ազդում»,- ասել է Սիդիկովը:
Նա հավելել է, որ ՀԱՊԿ գլխավոր քարտուղարի թեկնածության հարցով կողմերը բանակցություններ են անցկացնում:
«Մենք մեր նախագահությունն իրականացնում ենք մեր նախագահի սահմանած առաջնահերթությունների շրջանակում: Ծրագրվում է, որ ՀԱՊԿ գագաթնաժողովը տեղի կունենա աշնանը Բիշքեկում»,- ասել է Սիդիկովը՝ հավելելով, որ գագաթնաժողովը կկայանա, եթե նույնիսկ «մինչև աշուն կողմերը կազմակերպության նոր գլխավոր քարտուղարի թեկնածության հարցով միասնական որոշման չհանգեն»:
Նշենք, որ ՀԱՊԿ գլխավոր քարտուղարի պաշտոնը թափուր է 2018 թվականի նոյեմբերից, Հայաստանի նախաձեռնությամբ Յուրի Խաչատուրովի հետկանչից հետո:
Մինսկն այս պաշտոնում առաջադրել է Բելառուսի Անվտանգության խորհրդի քարտուղարի Ստանիսլավ Զասի թեկնածությունը: ՀԱՊԿ անդամ բոլոր պետությունները՝ Հայաստանից բացի, ընդունել են Զասին և հաստատել նրա թեկնածությունը:
