Քաղաքականություն
25.03.2019 | 16:16«Քաղաքացու իրավունքների պաշտպան» ՀԿ նախագահ Կարեն Հեքիմյանն այսօր հրավիրված մամուլի ասուլիսի ժամանակ անդրադարձավ Արծվաշենը ՀՀ-ի քարտեզի մեջ չներառելու խնդրին՝ հիշեցնելով, որ 90-ական թվականներից է այս գործընթացը սկսել և շարունակվում է մինչ այսօր։
«Հայաստանի վարչական մարմինները՝ պետական կառույցներն ու հանրային նշանակության կառույցները չեն ներառել Արծվաշենը ՀՀ-ի քարտեզի մեջ․ այդպիսի կառույցներից են, օրինակ, ՀՀ ոստիկանությունը, տարածքային կառավարման և զարգացման նախարարությունը, շատ այլ պետական կառույցներ և հանրային նշանակության կազմակերպություններ։ Անգամ զավեշտի է հասնում, որ ՀՀ-ի վարորդական իրավունքներում Արծվաշենը ներառված չէ, և դա նույնն է, որ ասենք Ֆրանսիայի վարորդական իրավունքը առանց Կորսիկայի լինի։ Այս խնդրի հետ կապված մեծ աղմուկ բարձրացվեց, և ոստիկանությունը խոստացավ մինչև այս տարվա վերջ թողարկել նոր վարորդական իրավունքներ և Արծվաշենը ներառել ՀՀ քարտեզի մեջ»,- ասաց Հեքիմյանը։
Վերջինս ընթերցեց ՔՕ 300․1 հոդվածը, ըստ որի, ՀՀ-ի տարածքի մասն առանձնացնելը կամ այլ պետությանը հանձնելը պատժվում է ազատազրկմամբ 10-15 տարի ժամկետով։
Կարեն Հեքիմյանը նշեց, որ այս հոդվածի վերաբերյալ մի քանի անգամ դիմել է Դատախազությանը՝ պարզելու համար, թե ով է Արծվաշենը փոխանակել և ինչի հետ։
«Դատախազությունից ինձ գրել են, որ որևէ հանցագործություն չկա»,- ասաց Հեքիմյանը՝ հիշեցնելով, որ կրկին նույն հարցով դիմելու է Դատախազությանը, պետական այլ մարմինների՝ հիշեցնելով, որ Արծվաշենը Հայաստանի քարտեզի մեջ չներառելով կատարվում է հանցագործություն։
Մանրամասները՝ տեսանյութում։
Աղավնի Սուքիասյան
