17.05.2026 | 23:35
Հենրիխ Մխիթարյանը՝ «Ինտեր» – «Վերոնա» հանդիպման լավագույն ֆուտբոլիստ․ ՏԵՍԱՆՅՈՒԹ
Ինչո՞ւ Հարկային օրենսգիրքն արդեն 8 ամիս է՝ ԱԺ չի հասնում. ԲՀԿ-ական պատգամավորը՝ նախարարին. ՏԵՍԱՆՅՈՒԹ
Տնտեսություն
25.03.2019 | 12:51
Ազգային ժողովի «Բարգավաճ Հայաստան» խմբակցության պատգամավոր Արտյոմ Ծառուկյանն այսօր ԱԺ տնտեսական հարցերի հանձնաժողովի նիստի ժամանակ ՀՀ տնտեսական զարգացման և ներդրումների նախարար Տիգրան Խաչատրյանից հետաքրքրվեց՝ ինչո՞վ է պայմանավորված Հարկային օրենսգիրքը խորհրդարան ուղարկելու ժամկետների ձգձգումը։
«Կառավարությունը ձեռնամուխ է եղել տնտեսական հեղափոխության իրականացմանը, իսկ ինչո՞ւ արդեն 8 ամիս է՝ Հարկային օրենսգրքի փոփոխությունները չեն հասնում Ազգային ժողով: Տնտեսական բլոկի բոլոր փոփոխությունները չե՞ն առնչվում Հարկային օրենսգրքին»,- ասաց պատգամավորը։
Ի պատասխան՝ նախարար Տիգրան Խաչատրյանը նշեց, որ թեև Հարկային օրենսգրքում նախատեսվում են այնպիսի փոփոխություններ, որոնք, այո՛, ներդրումային միջավայրի ձևավորման վրա զգալի ազդեցություն են ունենալու, սակայն Հարկային օրենսգիրքը չի հասնում Ազգային ժողով, որովհետև կան փոփոխություններ, որոնք ունեն հանրային քննարկումների անհրաժեշտություն։
«Օրինակ՝ շահութահարկի նվազեցում է առաջարկվում, սակայն այդ հարկային եկամուտները պետք է փոխհատուցվեն։ Ակցիզային հարկի դրույքաչափի բարձրացումը պետք է կոմպենսացնի հարկային շեմի իջեցումը, իսկ այս առաջարկի վերաբերյալ կա հանրային քննարկման պահանջ»,- ասաց նախարարը՝ նշելով, որ հանրային քննարկումներից հետո էլ Կառավարությունն Ազգային ժողով կուղարկի առաջարկվող փոփոխությունների վերաբերյալ հիմնավորումներ:
Նախարարի պատասխանը չբավարարեց ԲՀԿ-ական պատգամավորին։ «Մենք չենք կարծում, որ Հարկային օրենսգրքի վերաբերյալ փոփոխություններն այսպես են արվում»,- նկատեց Ծառուկյանը։
Մանրամասները՝ տեսանյութում:
Աղավնի Սուքիասյան
