17.01.2026 | 20:00
ՔՆՆԱՐԿՈՒՄ․ ՀՀ-ն ինչպե՞ս է կատարել ԵՄ-ի հետ CEPA համաձայնագիրը․ մշտադիտարկման արդյունքներ
Մալաթիա-Սեբաստիա վարչական շրջանի ղեկավարը 2012թ. առ այսօր սովորում է․ քաղաքապետարանի կայքում կենսագրական տեղեկություններ են հայտնվել
Հասարակություն
22.03.2019 | 16:24
Երևանի ավագանու «Լույս» խմբակցության անդամ Դավիթ Խաժակյանն իր ֆեյսբուքյան էջում գրառում էր կատարել՝ նշելով, թե պարզել է, որ Մալաթիա-Սեբաստիա վարչական շրջանի ղեկավար Դավիթ Կարապետյանը, կարծես, բարձրագույն կրթություն չունի, հետևաբար՝ Հանրային ծառայության մասին օրենքով նաև չունի այդ պաշտոնը զբաղեցնելու իրավունք։
«Հավանաբար այս է պատճառը, որ վերջինիս կենսագրականը բացակայում է քաղաքապետարանի կայքից»,- նշել էր ավագանու անդամը։
Factor.am-ը փորձեց պարզել՝ Մալաթիա-Սեբաստիա վարչական շրջանի ղեկավար Դավիթ Կարապետյանը բարձրագույն կրթություն ունի, թե՞ ոչ։
Կենսագրական տվյալը պարզել չհաջողվեց: Վարչական շրջանի աշխատակազմից հայտնեցին, որ իրենց ղեկավարը հեռախոսով հարցազրույցներ չի տալիս՝ առաջարկելով դիմել քաղաքապետարանի լրատվական ծառայություն՝ հարցազրույց կազմակերպելու համար:
Եվ մինչ փորձում էինք Երևանի քաղաքապետարանի միջոցով Դավիթ Կարապետյանի հետ հարցազրույց կազմակերպել՝ ավագանու անդամի գրառման վերաբերյալ նրա մեկնաբանությունը ստանալու համար, Երևանի քաղաքապետարանի կայքում ավելացվեց նրա կենսագրությունը: Դրա համաձայն՝ վարչական շրջանի ղեկավարը 2012 թվականից առ այսօր սովորում է Հայաստանի ազգային ագրարային համալսարանի ագրոբիզնեսի և տնտեսագիտության ֆակուլտետում։
Աղավնի Սուքիասյան
