«Վերածնունդ» երիտասարդական ավանի հիմնարկեքի արարողությունը․ ՈՒՂԻՂ 

Մեկնարկել է «Վերածնունդ» երիտասարդական ավանի հիմնարկեքի պաշտոնական արարողությունը:

Արարողության ընթացքում ծրագրի շահառուները կառուցվող համալիրի հիմքերում կտեղադրեն  սերունդներին ուղղված ուղերձը, կկատարվի հիմնաքարի ու երիտասարդ ընտանիքների օրհնության կարգ և ծրագրի ֆինանսավորումն իրականացնող բանկերի հետ կկնքվեն համագործակցության պայմանագրեր։

Երիտասարդական ավանն ունենալու է շուրջ 1100 բնակարան, 800 ավտոմեքենայի կայանման համար նախատեսված վերգետնյա և ստորգետնյա ավտոկայանատեղի, հասարակական նշանակության տարածքներ, մանկապարտեզ, մարզաառողջարանային համալիր։ Անցկացվելու է ամբողջովին նոր կոմունիկացիոն համակարգ, ժամանակակից արտաքին լուսավորություն։ Առաջին անգամ Երևանում, կառուցվող թաղամասն ունենալու է կոյուղաջրերի մաքրման անհատական կայան, որտեղ համապատասխան ֆիլտրումից հետո կոյուղաջրերն օգտագործվելու են տարածքի ոռոգման նպատակով։ Ծրագրի թիրախային խմբում ընդգրկված են ՀՀ ՏՏ և հեռահաղորդակցության ոլորտի կազմակերպությունների, բանկերի, վարկային կազմակերպությունների երիտասարդ մասնագետները, երիտասարդ մանկավարժները, լրագրողները, բժիշկները, դասախոսները, գիտնականներն ու ստեղծագործողները, պետական ու համայնքային ծառայողները, մարզիկները;

Բնակարանների 1 քմ․-ի արժեքը կազմում է 276․000 – 296․000 ՀՀ դրամ՝ կախված ներքին հարդարումից։

Կառուցվող շենքերը շահագործման կհանձնվեն 2021 թ․ հոկտեմբերին, իսկ թաղամասի կառուցապատումն ամբողջությամբ կավարտվի 2022 թ․ մայիսին։

Երիտասարդական ավանի կառուցման ծրագրի ընդհանուր արժեքը կազմում է շուրջ 54 մլրդ ՀՀ դրամ։

Ծրագրի շրջանակում առաջիկա 3 տարվա ընթացքում կստեղծվի շուրջ 1400 աշխատատեղ։

Նելլի Մելքոնյան