02.07.2026 | 14:43
Իրանը զգուշացնում է ԱՄՆ-ին և Իսրայելին Խամենեիի հուղարկավորության արարողությունից առաջ հարձակումների դեմ
«Մայբախի» վարորդի համար 5000 դրամ տուգանքը կանխարգելող որևէ էֆեկտ չի տալիս. պատգամավորը թանկարժեք մեքենաների համար տուգանքի բարձր շեմ է ցանկանում սահմանել. ՏԵՍԱՆՅՈՒԹ
Հասարակություն
21.03.2019 | 13:59
Ազգային ժողովի պատգամավոր, «Իմ քայլը» խմբակցության անդամ Վիկտոր Ենգիբարյանն առաջարկում է խախտումներով ավտոմեքենա վարող վարորդներին տուգանել ըստ մեքենայի արժեքի: Օրինակ, եթե վարորդներից մեկը վարում է 50 հազար դոլար արժեցող մեքենա, իսկ մյուսը՝ 5, բայց անում են նույն խախտումը` վճարեն տարբեր գումարներ:
Պատգամավորը կարծում է, որ թանկարժեք մեքենաներ վարող անձանց համար խնդիր չէ հարկ եղած դեպքում խախտում անելը, քանի որ տուգանքի համար նախատեսված մի քանի հազար դրամ վճարելը մեծ գումար չէ:
««Մայբախի» վարորդի համար հինգ հազար դրամ տուգանքը կանխարգելող որևէ էֆեկտ չի տալիս, պատկերացնենք, որ նա խաչմերուկն անցնելիս պետք է որոշում կայացնի՝ խախտում իրականացնի՞, թե՝ ոչ: Իր մտքում կլինի հինգ հազար դրամը վճարելը և որոշումը կլինի անցնելու օգտին: Մենք խոսում ենք տուգանքների հաճախականությունը քչացնելու մասին: Եթե մի վարորդի համար X գումարը շատ մեծ է, որը պետք է աշխատի տասը օրում, մեկ ուրիշի համար դա աննկատ գումար է: Շատ քաղաքացիներ նաև բողոքում են, որ ամենաշատ խախտումներն անում են տաքսիները: Այո, դա կա, դա խնդիր է, այդ խնդիրն էլ պետք է լուծել»:
Վիկտոր Ենգիբարյանը մեզ հետ զրույցում ասաց, որ գաղափարը դեռ նախագծի չի վերածվել: Ֆեյսբուքում ծավալած քննարկումների արդյունքում առայժմ փորձում է հասարակական կարծիքին ծանոթանալ:
«Մեծ մասը դեմ է, ինչը խոսում է այն մասին, որ պետք է ավելի զգուշավոր լինել այս նախագծի հետ: Շատերն էլ կողմ են, շատերն էլ այլ առաջարկներ են անում»,- ասում է նա:
Factor.am-ը պատգամավորից հետաքրքրվեց՝ արդյոք կա վիճակարգրություն, որ հիմնականում խախտումներն անում են թանկարժեք մեքենաների վարորդները, և, եթե նրանց համար տուգանքի շեմը բարձրացվի, ապա նրանք ըստ կարգի կվարեն ավտոմեքենաները: «Նման վիճակագրության ես չեմ տիրապետում, բայց մենք բոլորս ականատես ենք լինում, որ հատկապես երեկոյան ժամերին, կան մեծ արագությունով սլացող թանկարժեք մեքենաներ: Սա հուշում է, որ տեսանկարահանող սարքերն, արագաչափերը կանխարգելող դեր չեն խաղում: Եթե դու ունես 20 հազար հավելյալ դրամ, որը քեզ պետք չի, անում ես խախտումը, վճարում ես գումարը: Սա պետության համար անընդունելի է»:
Մանրամասները՝ տեսանյութում:
Նարեկ Կիրակոսյան
