Նախկին պաշտոնյաները ազատ հողերը փայ-փայ բաժանել են․ բացահայտվելու են կեղծ աճուրդները․ նախարար․ ՏԵՍԱՆՅՈՒԹ

Տարածքային կառավարման և զարգացման նախարար Սուրեն Պապիկյանն այսօր հրավիրված մամուլի ասուլիսի ժամանակ, անդրադառնալով  բարձրաստիճան պաշտոնատար անձանց կողմից ապօրինի կերպով  սեփականաշնորհված հողատարածքները օրինական ճանապարհով  պետությանը վերադարձնելու գործընթացին, նշեց, որ տարիներ շարունակ կեղծ աճուրդներ են տեղի ունեցել բարձրաստիճան պաշտոնյաների մասնակցությամբ և եղել է ազատ տարածքները փայ-փայ անելու գործընթաց, իսկ այժմ դրանք բացահայտվելու են, ու ապօրինի կերպով սեփականաշնորհված հողատարածքները վերադարձվելու են պետությանը։

«Օրինակ՝ ՀՔԾ-ն ուսումնասիրություն է կատարել Մանվել Գրիգորյանին պատկանող տարածքներում և այդ ուսումնասիրության արդյունքներով կարող ենք եզրակացություն անել, որ աճուրդները տեղի են ունեցել սահմանված կարգի խախտմամբ, ոչ օրինական։ Հիմա մի շարք մարզերի համայնքներում տասնյակ հեկտարների հողատարածքներ տարբեր մարդկանց են պատկանել, բայց նրանց անունով սեփականության վկայականները հայտնաբերվել են Մանվել Գրիգորյանի տանը։ Գործի քննության ավարտից հետո մենք, հավանաբար, կդիմենք ՀՀ վարչական դատարան այդ սեփականաշնորհման գործընթացները չեղարկելու համար»,- մանրամասնեց նախարարը։

Սուրեն Պապիկյանը հրաժարվեց նշել նախկին բարձրաստիճան այլ պաշտոնյաների անուններ, որոնց կողմից իրականացվել են օրենքի խախտմամբ հողի սեփականաշնորհում՝ խորհուրդ տալով սպասել համապատասխան մարմինների կողմից քննվող գործերի ավարտին։

Մանրամասները՝ տեսանութում։

Աղավնի Սուքիասյան