15.01.2025 | 09:46
«Խաղաղության խաչմերուկ»-ը միանգամայն ճիշտ և իմաստուն պատասխան է Ադրբեջանի պահանջներին․ Շտեֆան Մյուլլեր-Ալտերմատ
Մհեր Գրիգորյանը ԵՄ գործընկերներին ներկայացրել է Կառավարության առաջնայնությունները
Քաղաքականություն
19.03.2019 | 21:10
ՀՀ կառավարությունից տեղեկացնում են, որ փոխվարչապետ Մհեր Գրիգորյանն ընդունել է Եվրոպական հանձնաժողովի հարևանության և ընդլայնման բանակցությունների հարցերով գլխավոր տնօրինության արևելյան հարցերով տնօրեն Լոուրենս Մերեդիթի գլխավորած պատվիրակությանը: Հանդիպմանը ներկա էր նաև ՀՀ-ում ԵՄ պատվիրակության ղեկավար, դեսպան Պյոտր Սվիտալսկին:
«Ողջունելով հյուրերին՝ փոխվարչապետը բարձր է գնահատել Եվրոպական միության կողմից ՀՀ-ին տրամադրված աջակցությունը և հույս հայտնել, որ ՀՀ-ԵՄ համագործակցությունը համատեղ ջանքերի շնորհիվ կզարգանա և կընդլայնվի: Անդրադառնալով ՀՀ վարչապետի՝ վերջերս Բրյուսել կատարած այցին՝ փոխվարչապետը կարևորել է ձեռքբերված պայմանավորվածությունների ուղղությամբ համատեղ շարունակական աշխատանքների իրականացումը:
Հանդիպման սկզբում փոխվարչապետը ներկայացրել է Կառավարության ծրագրի առաջնայնությունները և շեշտել, որ դրանք համահունչ են ՀՀ-ԵՄ Համապարփակ և ընդլայնված գործընկերության համաձայնագրին: Մհեր Գրիգորյանի համոզմամբ՝ համաձայնագիրը ոչ միայն համագործակցության վերաբերյալ փաստաթուղթ է, այլ Հայաստանի բարեփոխումների օրակարգ, որի շուրջ պետք է մշակվեն նաև ոլորտային ռազմավարությունները: Փոխվարչապետը կարևորել է հատկապես ենթակառուցվածքների զարգացման, բնապահպանության, էներգախնայողության, մարդու իրավունքների և կապիտալի պաշտպանության ուղղությամբ նախատեսված բարեփոխումների իրականացումը: Ենթակառուցվածքների զարգացման մասին խոսելիս Մհեր Գրիգորյանն առանձնացրել է հատկապես արդիականացման և բարեփոխումների անհրաժեշտությունը ճանապարհների, ջրային ռեսուրսների կառավարման և էներգետիկայի ոլորտներում: Որպես բարեփոխումների մեկ այլ կարևորագույն ուղղություն՝ փոխվարչապետը նշել է արդարադատության ոլորտում բարեփոխումները, որոնք միտված կլինեն դատական գործընթացների արդյունավետության և թափանցիկության բարձրացմանը:
Շնորհավորելով նոր կառավարության ձևավորման առթիվ՝ Եվրոպական հանձնաժողովի հարևանության և ընդլայնման բանակցությունների հարցերով գլխավոր տնօրինության արևելյան հարցերով տնօրեն Լոուրենս Մերեդիթը գոհունակությամբ է խոսել ՀՀ կառավարության՝ բարեփոխումներ իրականացնելու պատրաստակամության մասին: Նա ներկայացրել է ԵՄ աջակցության հիմնական գործիքները, որոնք հնարավոր է կիրառել Հայաստանում տարբեր ոլորտներում նախանշված բարեփոխումներն առավել արդյունավետ իրականացնելու նպատակով: Լոուրենս Մերեդիթը նշել է, որ անձամբ ինքը, ՀՀ-ում ԵՄ դեսպանն ու ԵՄ պատվիրակության թիմը պատրաստակամ են աջակցելու Հայաստանին այս կարևոր փուլում:
Զրուցակիցները մտքեր են փոխանակել Հայաստանի զարգացման հիմնական հնարավորությունների շուրջ և երկուստեք նշել, որ ի թիվս այլ ուղղությունների՝ Հայաստանն ունի զբոսաշրջության զարգացման մեծ ներուժ»,- ասված է հաղորդագրությունում:
