Այսօր մեր Կառավարությունում չկա պաշտոնյա, որին ասենք՝ ձախողվել ես. Նիկոլ Փաշինյան. ՏԵՍԱՆՅՈՒԹ

Վարչապետ Փաշինյանը կաշկանդված չէ Կառավարության կազմում այս կամ այն պաշտոնյային ասելու ցտեսություն, եթե վերջինս լավ չի աշխատում, սակայն պնդում է՝ ըստ էության, որևէ ոլորտում  իր Կառավարությունը ձախողում չի ունեցել։

«Այսօր մեր պետական կառավարման համակարգում չկա պաշտոնյա, որին ասենք գործդ ձախողել ես․ մենք միայն մեկ ոլորտում ենք ունեցել ձախողում, և դա հանրահայտ ձախողումն է։ Ուրիշ բան, որ կա արագության և դանդաղության հետ կապված խնդիր, սակայն կրկնում եմ՝ չկա մի պաշտոնյա, որին ասենք, որ դու ձախողել ես։ Այնպես որ, երբ գա այդ գծին հասնի, ես կաշկանդված չեմ որևէ պաշտոնյայի ասելու ցտեսություն»,- այսօր հրավիրված մամուլի ասուլիսի ժամանակ ասաց վարչապետը՝ նշելով որ չի ընդունում այն տեսակետը, երբ ամեն մի բացթողման համար աշխատանքից ազատում են այս կամ այն պաշտոնյային։

«Մենք հիմա պետք է բոլորին ուղարկենք տո՞ւն, որից հետո կգան նորերը և հաստատ նույնատիպ իրավիճակը կկրկնվի։ Ես կողմնակից եմ, որ մենք մեր սխալները ընդունենք որպես դաս։ Օրինակ՝ այն սկանդալները, որոնք կապված էին ՊԵԿ-ի հետ․ մենք ունեինք պարզ ընտրություն՝ կամ հանրային տրամադրությունները խաղաղեցնելու համար հանել նրանց աշխատանքից, ջնջել, կամ հասկանալ իրավիճակը և հանրային ճնշումն օգտագործել որպես այդ համակարգի աշխատանքի արդյունավետության բարձրացման գործիչ։ Այո՛, շատ խնդիրներ են եղել, բայց ես նախընտրում եմ երկրորդ տարբերակը, որովհետև ամեն անգամ քավարանի միջոցով անցնելուց հետո ցանկացած պաշտոնյա ավելի պատասխանատու է լինում»։

Մանրամասները՝ տեսանյութում։

Նարեկ Կիրակոսյան