Քաղաքականություն
16.03.2019 | 17:00Factor.am-ի հարցազրույցը Արցախի ԱԺ ՀՅԴ խմբակցության ղեկավար Արմեն Սարգսյանի հետ
-Պարոն Սարգսյան, ԵԱՀԿ Մինսկի խմբի համանախագահների հայտարարությանը հաջորդեց Հայաստանի և Արցախի ԱԽ համատեղ նիստը: ՀՅԴ-ն ինչպե՞ս է գնահատում համանախագահների և Հայաստանի ղեկավարի հայտարարությունը:
-Մենք միանշանակ դեմ ենք Մադրիդյան սկզբունքներին և այն հիմնական կետերին, որ դրված է բանակցությունների սեղանին: Մենք կողմ ենք, որ պետք է խաղաղ ճանապարհով լուծվի: Ողջունում ենք Հայաստանի և Արցախի ԱԽ համատեղ նիստը: Առաջին անգամ բաց ձևով քննարկվեցին սկզբունքները, որոնցով պետք է շարունակվեն բանակցությունները: Ոչ թե բանակցություններից հետո ինֆորմացիա տրվեց արդյունքների մասին, այլ քննարկվեցին սկզբունքները: Մենք կողմ ենք, որ Արցախը պետք է լինի բանակցությունների ուղղակի և լիիրավ կողմ:
-Համանախագահները հայտարարում են, որ պետք չէ բանակցային գործընթացի վերաբերյալ հայտարարություններ անել, որոնք համաձայնեցված չեն հակառակ կողմի հետ` նկատի ունենալով Արցախին բանակցություններում ներգրավելու հայկական փորձերը: Այս երկու տարբեր մոտեցումներն ինչի՞ կհանգեցնեն:
-ՀՀ-ն առաջ է քաշել նոր գաղափար և ոչ թե ենթարկվում է Մինսկի խմբի համանախագահների առաջադրած պայմաններին, այլ առաջարկում է նոր սկզբունքներ: Հայաստանն ինքն է առաջադրում, թե ֆորմատը ինչպես պետք է լինի: Մինսկի խմբի հայտարարությունն այս փուլում պայմանավորված է այն հանգամանքով, որ Հայաստանի կողմից հնչեցվել է նոր գաղափար: Այն փոփոխությունները, որոնք առաջարկում է Հայաստանը, հիմնականում ճիշտ են և պետք է զարգացնել:
-Սահմանի զորավարժություններն Արցախում մտահոգություններ առաջացնո՞ւմ են:
-Մենք զգուշանում ենք, վերլուծում ենք, բայց չէի ասի, որ լուրջ մտահոգում է: Այնքան քաղաքական խաղեր ու զորավարժություններ ենք տեսել, որ արցախցին կարողանում է լավ կողմնորոշվել: Պետք է զգուշանալ և պատրաստվել ամեն ինչի:
-Պարոն Սարգսյան, արցախցին մի իրավիճակում է, որ իր ճակատագիրը պետք է որոշեն այլ պետությունները: Այս իրավիճակն ինչպե՞ս եք գնահատում:
-Արցախի ժողովրդի ճակատագիրը պետք է որոշվի Արցախի համապատասխան ղեկավարության մասնակցությամբ:
-Պարոն Սարգսյան, առաջիկայում ընտրություններ են: Դաշնակցությունը պատրաստվու՞մ է, նախագահի հավանական թեկնածուներ ունե՞ք:
-Մենք կողմ ենք, որ առաջիկա քաղաքական ընտրություններում լինի ծրագրային պայքար, ոչ թե անհատական պայքար: Անհատական պայքարը չի բերում նրան, ինչը որ ժողովուրդը երազում է: Դաշնակցությունն ունի նախագահի երեք-չորս թեկնածուներ, բայց ՀՅԴ-ն այնպիսի կուսակցություն է, որ չի բացառվում, որ առաջադրի անկուսակցական թեկնածուի:
Հարցազրույցն ամբողջությամբ՝ տեսանյութում:
Նարեկ Կիրակոսյան
