Փաշինյանը մի ելք ունի․ քանի ուշ չէ՝ ժխտել նախորդ իշխանության քաղաքականությունը, Մադրիդյան սկզբունքները․ Բադասյան. ՏԵՍԱՆՅՈՒԹ

Factor.am-ի հարցազրույցն Արցախի «Միացյալ Հայաստան» կուսակցության հիմնադիր Վահան Բադասյանի հետ 

– Պարո՛ն Բադասյան, ԵԱՀԿ Մինսկի խմբի համանախագահների հայտարարությունն ինչպե՞ս եք գնահատում՝ Հայաստանի և Ադրբեջանի ղեկավարների հանդիպումից առաջ: Հայտարարության ենթատեքստում նաև այն էր, որ Արցախը չի կարող դառնալ բանակցող կողմ:

– Նիկոլ Փաշինյանը վարչապետ դառնալուց հետո Արցախում հայտարարեց, որ Արցախը դառնալու է բանակցային կողմ: Հիմա խոսում են, որ Արցախը երբեք չի եղել բանակցային կողմ, բայց ես համաձայն չեմ, քանի որ հրադադարի ստորագրումը եղել է եռակողմ, ուստի բանակցությունները պետք է ընթանային եռակողմ: Հայաստանի երկրորդ նախագահի ժամանակ դա դադարեց: Նիկոլ Փաշինյանի քայլը համարձակ էր, բայց ութ ամիս համանախագահների կողմից արձագանք չեղավ: Տրամաբանության մեջ էր, որ հեղափոխության արդյունքում Նիկոլ Փաշինյանը եկավ և ասեց նոր բան, բայց Նիկոլ Փաշինյանը չշարունակեց այդ նոր բանը: Նա քաղաքական գնահատական չտվեց արցախյան հարցում նախորդ իշխանության վարած քաղաքականությանը: Նիկոլ Փաշինյանը հայտարարեց, որ շարունակելու է նախորդ իշխանությունների արտաքին քաղաքականությունը:

Համանախագաներն էլ հայտարարություն արեցին, որ եթե ընդունում ես, ապա անմիջապես կատարի: Եթե նախորդ իշխանությունները խնդիրներ ունեին ժողովրդի հետ, Նիկոլ Փաշինյանը չունի: Նա այն անձն է, որն ինչ ասի, ժողովուրդը կընդունի: Նիկոլ Փաշինյանը մի ելք ունի, որ գնահատական տա նախորդներին՝ Կառավարության մակարդակով: Ճնշումներն այնքան են ավելացել, որ երկու ղեկավարների հանդիպումից առաջ համանախագահները հայտարարություն են տարածել, որ պետք է զիջել: Փոխզիջման մասին խոսք չկա:

– Հայաստանի վարչապետը ևս առաջ է տանում այն թեզը, որ չի կարող լինել խաղաղություն՝ տարածքների դիմաց, բայց համանախագահների հայտարարության մեջ ասվում է գրավյալ տարածքների վերադարձի մասին: Մեր իշխանությունների հետագա գործողությունները որո՞նք պետք է լինեն:

– Այստեղ է բառախաղը, որ տարածքների զիջում չի լինում: Նիկոլ Փաշինյանը կարող է ասել՝ տարածքների զիջում չի լինում, սակայն այն տարածքները, որ մերը չեն, որ գրավյալ են, պետք է վերադարձնենք: Այդ տարածքները գրավյալ չեն: Պետք է ժխտել, որ դրանք գրավյալ տարածքներ են, առևտուր չպետք է անել դրա վրա:

– Պարո՛ն Բադասյան, Ադրբեջանի կողմից անցկացվող զորավարժություններն անհանգստացնո՞ւմ են Ձեզ:

– Ինչքան ուզում է՝ լայնամասշտաբ զորավարժություններով հարձակման սպառնալիք լինի կամ հարձակում, միևնույն է, մենք թուրքին իր տեղը դնելու ենք՝ անկախ զոհերի քանակից: Ոչ մի բանի առաջ չենք կանգնելու, մեր տարածքները պահելու ենք անառիկ: Քաղաքական գործիչները թող ականջներին օղ անեն, որ մենք հանուն խաղաղության՝ պատերազմի ենք պատրաստ, ոչ թե տարածքներ զիջելուն:

Հարցազրույցն ամբողջությամբ՝ տեսանյութում:

Նարեկ Կիրակոսյան