Սա վանդալիզմ է, նոր կառավարությունն իր հաղթանակները մեր սրճարանում էր նշում. Էլիզաբեթ Ղազարյան. ՏԵՍԱՆՅՈՒԹ

Փչացնում են մեր գույքը, ո՞վ պետք է փոխհատուցի դրա համար: Լրագրողների հետ զրույցում ասաց Օպերային հարակից սրճարաններից մեկի սեփականատեր Էլիզաբեթ Ղազարյանը:

«Այնտեղ շատրվան կա, որը 25.000 դոլարից ավելի արժե, մեզ ժամանակ չեն տվել, որ դա հանենք: Հիմա ո՞վ պետք է փոխհատուցի: Հայտարարություններ են անում, որ մեզ ուրիշ տեղ են տարածք առաջարկել, ես խոսում եմ «Ատլանտիս Գարդենի» անունից, մեզ ոչ ոք ոչ մի տարածք չի առաջարկել»,- հավելեց նա: Ղազարյանի պնդմամբ՝ իրենք ժամանակ են խնդրել քաղաքապետարանից, որպեսզի սեփական ուժերով ապամոնտաժեն սրճարաններն ու տեր կանգնեն իրենց գույքին, բայց ժամանակ չեն տվել. «Մեզ ասել են՝ ողջամիտ ժամկետներում: 15 օր առաջ ենք ստացել այդ ծանուցումը: Մենք գնացինք քաղաքապետարան՝ ամեն սրճարանից երկու հոգի՝ սեփականատերերն ու իրավաբանները, և պահանջեցինք հանդիպում քաղաքապետի հետ: Նորից քաղաքապետը չեկավ: Բայց նորից խոսեցինք պարոն Մնացականյանի հետ, ինքը մեզ խոստացավ, որ երկու օրվա ընթացքում կխոսի քաղաքապետի հետ ու մեզ կասի հետագա քայլերը: Բայց մենք երեկ եկանք ու տեսանք, որ արդեն ապամոնտաժվում է»:

Էլիզաբեթ Ղազարյանը նշում է, որ ապամոնտաժման աշխատանքներն իրականացնողներին խնդրել է քաղաքապետի համապատասխան որոշումը ցույց տան, բայց ոչ ոք ոչ մի փաստաթուղթ չի ներկայացրել:

«Ի վերջո՝ այս հեղափոխությունը մենք ենք ուզել, մենք ենք արել: Տեսանյութերն էլ կարող եք տեսնել, նոր Կառավարությունն իր հաղթանակներն այստեղ է նշել: Բայց եկել քանդել են առաջինը հենց այս սրճարանը»,- հավելեց նա:

Մանրամասները՝ տեսանյութում:

Ռոբերտ Անանյան