Եթե Օպերայով սահմանափակվենք՝ արդար չի լինի, սա անելու ենք ամեն տեղ. Հայկ Մարության

Պրոցեսը հարյուր տոկոս օրինական է և փաստերը դրա մասին խոսում են, այստեղ խնդիր չունենք: Այս մասին «Առաջին ալիք»-ի եթերում հայտարարեց Երևանի քաղաքապետ Հայկ Մարությանը՝ անդրադառնալով հարցին, թե արդյոք օրինական է Օպերայի հարակից սրճարանների ապամոնտաժումը:

Դիտարկմանը, որ մարդիկ քաղաքապետարանի հետ պայմանագրեր են կնքել, ներդրումներ են արել, հիմա արդյոք նրանց իրավունքները չեն ոտնահարում, քաղաքապետն արձագանքեց. «Պայմանագրով նախատեսված է, որ վարձատուն՝ համայնքը, իրավունք ունի հրաժարվել պայմանագրից՝ մեկ ամիս առաջ ծանուցելով վարձակալին: Այս մասին բոլորն իմացել են և պետք է իրենց գործողությունները կատարեն դրա շրջանակներում»:

Այս պահին չեն ապամոնտաժվում Օպերայի շրջակայքի բոլոր սրճարանները: Հաղորդավարի դիտարկմանը, թե ինչու գործողությունները հավասարաչափ չեն ընթանում, քաղաքապետը մեկնաբանեց. «Առաջնային էտապով հենց Օպերային հարակից տարածքների սրճարաններն ենք ապամոնտաժելու: Այս պահին երկու սրճարանների հետ մենք դատական գործընթացի մեջ ենք, իսկ մյուս երկուսը համարվում են համայնքի տարածք, որոնք ապամոնտաժում ենք»:

Հաղորդավարի հարցին, որ սրճարանների աշխատողները գործազուրկ են մնալու, քանի որ, ըստ ցուցարարների, հարյուրավոր աշխատատեղեր են փակվելու, Մարությանը արձագանքեց. «Այդ թիվը, մեղմ ասած, ուռճացված է, մեր աշխատակիցները հաշվարկել էին, թե քանի աշխատակից կար այնտեղ, խոսքը տասնյակների, տասնյակի մասին է: Ամեն մի աշխատատեղն ինձ համար կարևոր է, բայց այս մարդիկ գտնելու են նոր աշխատանքներ: Կասկադի տարածքի սրճարաններում այստեղի աշխատողներից տասներկուսն արդեն գտել են նոր աշխատանք, բացի այս, Սարյան փողոցում բացված նոր սրճարաններից մեկը նրանց առաջարկություն է արել, որ իրենց պետք են որակյալ կադրեր: Միացել են նաև մյուս սրճարանները, որ մարդիկ առանց աշխատանքի չմնան»:

Երևանի քաղաքապետը հայտարարեց, որ սրճարանների սեփականատերերը քաղաքապետարանի հետ կոնտակտի դուրս չեն եկել.«Զանգել ենք տնօրեններին, ասել են՝ մենք չենք քանդելու, դուք ինչ ուզում եք արեք: Եթե սեփականատերերը չեն ցանկանում հանդիպել, կներեք…Միշտ հանդիպել են տնօրենները կամ այն մարդիկ, ովքեր աշխատացնում են կաֆեները»:

Հաղորդավարի հարցին՝ այն պաշտոնյաներն, ովքեր 90 հազար դրամով տարածքներ են տվել, պատասխանատվության ենթարկվելո՞ւ են, Հայկ Մարությանը պատասխանեց. «Բնականաբար: Նյութերն ուղարկում ենք Ոստիկանություն, Դատախազություն, քննչական մարմիններ: Սա մեզ մոտ մշտական բնույթ ստացած գործողություն է: Գալիս են մարդիկ, որոնք այգու մեջ երեք հազար ՔՄ սեփականություն ունեն՝ հանրային այգու մեջ»:

Դիտարկմանը, թե ինչո՞ւ են միայն Օպերայի տարածքի սրճարանները ապամոնտաժվում, քանի որ նույն խնդիրը կա նաև Օղակաձև այգում, Հրազդանի ձորում, քաղաքապետը արձագանքեց. «Եթե մենք միայն Օպերայով սահմանափակվենք՝ արդար չի լինի, բայց սա պրոցեսի սկիզբն է: Մենք սա անելու ենք ամեն տեղ, որտեղ նորմերը խախտված են, պետք է վերականգնվեն»:

Հարցին, արդյոք դա չի՞ հասցնի սոցիալական բունտի, քանի որ այնտեղ բազմաթիվ մարդիկ են աշխատում, Մարությանն ասաց, որ դա էտապային է արվելու: Հարցին՝ վաղը շարունակելո՞ւ են ապամոնտաժել, քաղաքապետը պատասխանեց. «Մենք վաղը շարունակելու ենք մեր աշխատանքերը մինչև վերջ: Մենք չենք քանդում, վերականգնում ենք»:

Հայկ Վարդանյան