20.12.2025 | 17:32
Եղեգնաձորի տներից մեկում և ավտոտնակում հրդեհ է բռնկվել
Անդրանիկ Քոչարյանը հայց է ներկայացրել «Հրապարակ» օրաթերթի դեմ
13.03.2019 | 19:32
ՀՀ ԱԺ պաշտպանության և անվտանգության հարցերի մշտական հանձնաժողովի նախագահ Անդրանիկ Քոչարյանը դատական հայց է ներկայացրել «Հրապարակ» օրաթերթի դեմ` պահանջելով ներողություն խնդրել և հերքել զրպարտություն պարունակող տեղեկությունները։
Խոսքը օրաթերթում և համանուն կայքում տեղ գտած «Ով է իրականում Անդրանիկ Քոչարյանը» վերնագրով նյութի մասին է։
Նշենք, որ սույն վերնագրով նյութում հոդվածի հեղինակ Հասմիկ Մելքոնյանը գրել էր, որ ովքեր 1990-ականներին համագործակցել են Անդրանիկ Քոչարյանի հետ, կա՛մ մահացել են, կա՛մ կորցրել են հիշողությունը և մի քանի պատմություններ ներկայացրել։
«Իմ քայլի» պատգամավորը նաև փոխհատուցման պահանջ է դրել՝ նվազագույն աշխատավարձի 1000-ապատիկի չափով։
«Հրապարակ» օրաթերթի գլխավոր խմբագիր Արմինե Օհանյանը Factor.am-ի հետ զրույցում ասաց, որ դատարանից իրենք որևէ գրություն չեն ստացել․ «Մենք ստացել ենք միայն Անդրանիկ Քոչարյանի կողմից ինչ-որ տեքստ։ Մենք ինչ-ինչ գործողություններ իրավասու ենք, պարտավոր ենք անել միայն դատարանի որոշումից հետո։ Դեռ գործընթացը չի սկսվել, միայն այն է, որ Անդրանիկ Քոչարյանը մեր հոդվածը վիճարկելու ցանկություն է հայտնել»։
Օրաթերթի խմբագիրը շեշտում է, որ տեքստի հեղինակը իրենց լրագրողները չեն․ «Դա թղթակցություն է, Գյումրիից հասարակական գործիչ է հեղինակը, Հասմիկ Մելքոնյան, որը տարիքով, հասուն կին է, ապրել է այդ շրջանում, երբ որ Անդրանիկ Քոչարյանը աշխատել է Գյումրիում և գրել է իր հիշողություններն ու տպավորությունները։ Դա մեր հեղինակային հոդվածը չէ, այն տպագրվել է օրաթերթի նամակների բաժնում, որպես տվյալ անձի կողմից հեղինակային նյութ։ Հեղինակը կոնկրետ անձ է, որը ապրում է Գյումրիում, օրենքը այս դեպքում ասում է, որ իր ներկայացրած փաստերի, տվյալների, մեղադրանքի համար պատասխանատվություն կրում է տվյալ հոդվածի հեղինակը։ Այսինքն՝ հայցադիմում պիտի ներկայացվեր ոչ թե «Հրապարակի», այլ հեղինակի դեմ»,- ներկայացրեց խմբագիրը։
Փորձեցինք նաև մեկնաբանութուն ստանալ Անդրանիկ Քոչարյանից, սակայն նրա հետ կապ հաստատելու մեր փորձերը չհաջողվեցին։
Լիլիթ Շաբոյան
