Նախաձեռնություն՝ ուղղված հայոց լեզվի պահպանմանն ու տարածմանը. մեկնարկում է «Թելադրություն» նախագիծը. ՏԵՍԱՆՅՈՒԹ

Թելադրություն՝ կամավորության սկզբունքով և անանուն: ԿԳ նախարարությունը, Լեզվի կոմիտեն և «Բաց կրթություն» հասարակական կազմակերպությունն արդեն երկրորդ անգամ «Թելադրության» նախագիծն են կազմակերպել: Լեզվի կոմիտեի նախագահ Դավիթ Գյուրջինյանի խոսքով՝ նախաձեռնության առաջնային խնդիրը հայոց լեզուն պահպանելն ու տարածելն է:

«Տեսնում ենք, որ սոցիալական ցանցերում հայերեն չեն գրում: Այսօր լեզվի խնդիր ունենք: Այս նախաձեռնությունը որոշ չափով կնպաստի այդ խնդրի լուծմանը՝ ինչպես Հայաստանի սահմաններում, այնպես էլ դրանից դուրս»,- նշեց Դավիթ Գյուրջինյանը։

Թելադրությունն այս տարի նաև արևմտահայերեն է լինելու: Ըստ Դավիթ Գյուրջինյանի՝ արևմտահայերենի և արևելահայերենի միջև տարբերակումներ պետք չէ դնել, այդպես ավելի ճիշտ է: Թելադրության տեքստի հեղինակը Լեզվի կոմիտեի աշխատակից, մանկագիր Երազիկ Գրիգորյանն է: Դավիթ Գյուրջինյանն ասում է՝ ստեղծագործության մեջ դժվար բառեր կան, սակայն դրանք արհեստականորեն ավելացված չեն: Բացի այդ՝ տեքստը կապ ունի Հովհաննես Թումանյանի 150-ամյակի հետ։ Թելադրությունը կանցկացվի միաժամանակ մի քանի վայրում:

«Բաց կրթություն» հասարակական կազմակերպության տնօրեն Հայկ Դավեյանի խոսքով՝ այս պահին դեռ հարթակների ներգրավմամբ են զբաղված. պատրաստվում են դիմել համալսարաններին, դպրոցներին ու հասարակական կազմակերպություններին: ԿԳ նախարարի խորհրդական Գոհար Մամիկոնյանը տեղեկացրեց, որ թելադրողների թվում է լինելու նաև ԿԳ նախարար Արայիկ Հարությունյանը: «Թելադրություն»-ը տեղի կունենա մարտի 30-ին:

Գրանցվել հնարավոր կլինի մարտի 20-ից, նախագծի պաշտոնական կայքում՝ teladrutyun.com: Նախագծի ավարտից հետո տեքստի ամբողջական տարբերակը կտեղադրվի «Թելադրության» կայքում և ֆեյսբուքյան էջում, իսկ արդյունքները մասնակիցներին կուղարկվեն էլեկտրոնային փոստով: Գնահատումը կկատարվի 5 բալանոց համակարգով՝ լեզվաբանի կողմից նախօրոք սահմանված չափանիշներով: Կազմակերպիչները նշում են, որ հաջորդ տարվանից կփորձեն նախագծում ներգրավել նաև Սփյուռքը:

Մանրամասները՝ տեսանյութում:

Նելլի Մելքոնյան