Հասարակություն
12.03.2019 | 19:23
ՀՀ պաշտպանության նախկին նախարար Վիգեն Սարգսյանն իր ֆեյսբուքյան էջում այսօր գրել էր, որ Դիլիջանում տեղակայված Մոնթե Մելքոնյանի անվան ռազմամարզական վարժարանի գույքը փորձում են օտարել կոմերցիոն նպատակներով:
«Համարել են, որ դա բանակին, հատկապես՝ կուրսանտներին, շատ կլինի: Չէի հավատում, քանի որ աղբյուրը պետգույքի վարչության տեխնիկական աշխատակից էր, բայց այսօր տեղեկությունն անձամբ ինձ հաստատեց ՊՆ բարձրաստիճան մի պաշտոնյա»,- գրել էր նախկին նախարարը:
Factor.am-ը փորձեց վարժարանի գույքի օտարման հարցը ճշտել ՊՆ խոսնակ Արծրուն Հովհաննիսյանից:
«Մոնթե Մելքոնյանի անվան վարժարանն ինչպես գործել է, այնպես էլ շարունակելու է գործել որպես կառույց։ Այն շարունակելու է գործել՝ անկախ ամեն ինչից»,- ի պատասխան հարցին՝ արդյո՞ք վարժարանի գույքն օտարվում է, ինչպես գրել է նախկին նախարարն, ասաց Հովհաննիսյանը:
Հարցին՝ հնարավո՞ր է, որ այն այլևս Դիլիջանում չգործի, Պն խոսնակն արձագանքեց. «Այդ մասին որևէ բան չեմ կարող ասել»: Հարցին էլ, թե, ըստ որոշ տեղեկությունների, մոտ ապագայում չի բացառվում, որ կարող է դրվել նաև վարժարանի փակման հարցը, Հովհաննիսյանը պատասխանեց. «Կրկնում եմ՝ որպես կառույց այն գործելու է»:
Աղավնի Սուքիասյան
