18.12.2025 | 01:35
Տհաճ միջադեպ՝ Արման Ծառուկյանի մենամարտի ժամանակ. ՏԵՍԱՆՅՈՒԹ
Վենեսուելայում արտակարգ դրություն է հայտարարվել
Քաղաքականություն
12.03.2019 | 13:45
Վենեսուելայում արտակարգ դրություն է հայտարարվել: Այս քայլով Կառավարությունն աջակցում է ընդդիմության առաջնորդ, ինքնահռչակ նախագահ Խուան Գուայդոյի նախաձեռնությանը, գրում է Lenta-ն:
Արտակարգ դրությունը սահմանվել է հոսանքազրկումների պատճառով, որոնք սկսվել են մարտի 7-ին և տևելու են 30 օր: Հրամանով Վենեսուելայի Զինված ուժերից պահանջվում է նաև պաշտպանել Corpoelec պետական էներգետիկ ընկերության աշխատակիցների և օբյեկտների անվտանգությունը։
Ավելի վաղ Խուան Գուայդոն հայտարարել էր, որ պատրաստվում է Ազգային ժողով դիմել՝ երկրում արտակարգ դրություն սահմանելու խնդրանքով: Ըստ նրա՝ դա կօգնի այլ երկրներից օգնություն խնդրել:
Էներգիայի մատակարարման խնդիրներ են գրանցվել երկրի 24 նահանգներից 23-ում: Վենեսուելայի նախագահ Նիկոլաս Մադուրոն սա ԱՄՆ-ի կողմից հրահրված «էլեկտրական պատերազմ» է անվանել: Երկրի ազգային էներգետիկ ընկերությունը տեղի ունեցածը բացատրել է Բոլիվար նահանգի ՀԷԿ-ում տեղի ունեցած դիվերսիայով: Իսկ Կապի և տեղեկատվության նախարար Խորխե Ռոդրիգեսը հայտարարել է, որ հաստատությունը տուժել է ԱՄՆ-ի կիբերհարձակումներից:
Հիշեցնենք, որ Վենեսուելայում իրավիճակը սրվել է հունվարի 23-ին, երբ զանգվածային բողոքի ակցիաների ֆոնին խորհրդարանի խոսնակ Խուան Գուայդոն իրեն երկրի ժամանակավոր նախագահ է հայտարարել: Նրան որպես նախագահ ճանաչել են ԱՄՆ-ն, Լատինական Ամերիկայի և Եվրոպայի մի շարք երկրներ:
Նելլի Մելքոնյան
