11.03.2026 | 23:28
Իրանի սպորտի նախարարը հայտարարել է, որ երկիրը չի մասնակցի ֆուտբոլի աշխարհի առաջնությանը
Ստեփանակերտում մեկնարկել է Հայաստանի և Արցախի ԱԽ համատեղ նիստը
Քաղաքականություն
12.03.2019 | 10:43
Քիչ առաջ Արցախի նախագահի նստավայրում մեկնարկեց Հայաստանի և Արցախի անվտանգության խորհուրդների համատեղ նիստը: Այս մասին Ստեփանակերտից տեղեկացնում է Factor.am-ի լրագրողը։
Հիշեցնենք, որ մի քանի օր առաջ ԵԱՀԿ Մինսկի խմբի համանախագահները համատեղ հայտարարությամբ են հանդես եկել, որում, մասնավորապես նշվում է, որ բանակցային գործընթացում ձևաչափի փոփոխություն չպետք է լինի։ Հավելենք, որ Հայաստանի վարչապետն էլ հայտարարում է, որ Արցախը պետք է դառնա բանակցող կողմ։
Պաշտոնական աղբյուրները՝ Հայաստանի վարչապետի և Արցախի նախագահի մամուլի ծառայությունները, չեն նշում, թե համատեղ նիստի օրակարգում ինչ է ներառված։ Factor.am-ի Ստեփանակերտի աղբյուրների փոխանցմամբ՝ երկու երկրները անվտանգության խորհրդի նիստ են հրավիրել Ադրբեջանի կազմակերպած զորավարժությունների հետ կապված:
Նշենք, որ Ադրբեջանը մարտի 11-ից 15-ը լայնածավալ զորավարժություններ է իրականացնում, որոնց մասին չի ծանուցվել։ ՀՀ ՊՆ նախարարի մամուլի քարտուղար Արծրուն Հովհաննիսյանը հայտարարել էր, թե ենթադրվում է, որ այս զորավարժությունը կազմակերպվել է Փաշինյան-Ալիև հանդիպման համատեքստում և ճնշման փորձ է, ի պատասխան այն հայտարարությունների, որ ազատագրված տարածքներից Հայաստանը ոչ մի տարածք չի զիջելու Ադրբեջանին:
Հավելենք, որ ի սկզբանե երեկ հայտարարվեց, թե Ստեփանակերտում կայանալու է Արցախի ԱԽ արտահերթ նիստ, այնուհետ հաղորդագրություն եղավ, որ Արցախի մայրաքաղաքում կայանալու է Հայաստանի ԱԽ հերթական նիստը, իսկ արդեն ուշ երեկոյան Նիկոլ Փաշինյանը իր ֆեյսբուքյան էջում գրեց, որ այսօրվա նիստը Արցախի և Հայաստանի Անվտանգության խորհուրդների համատեղ նիստ է:
Նարեկ Կիրակոսյան
