Կարմրուկի հիվանդացության առումով մեր երկում չկա համաճարակային իրավիճակ․ Գայանե Սահակյան

ՀՀ ԱՆ իմունականխարգելման ազգային ծրագրի ղեկավար, «Հիվանդությունների վերահսկման և կանխարգելման ազգային կենտրոնի» գլխավոր տնօրենի խորհրդական Գայանե Սահակյանն այսօր հրավիրված մամուլի ասուլիսի ժամանակ ներկայացրեց հանրապետությունում կարմրուկի վարակման դեպքերի վիճակագրությունը։

Ըստ Գայանե Սահակյանի՝ կարմրուկի հիվանդացության  առումով մեր երկում չկա համաճարակային իրավիճակ:

«Կարմրուկի վերջին բռնկումը գրանցվել է 2004 թվականին, սակայն մասսայական պատվաստումներ իրականացնելուց հետո հնարավոր է  դարձել  կանխարգելել կարմուկի տարածումը: Չնայած այն հանգամանքին, որ Հայաստանում կարմրուկի տեղական տարածում չի լինում, յուրաքանչյուր տարի, սակայն, հիվանդության դեպքեր գրանցվում են: Այս տարի դրանք արտահայտվել են արտերկրից եկած քաղաքացիների մոտ»,- ասաց  Սահակյանը։

Գայանե Սահակյանի խոսքով՝ այս տարի արձանագրվել է հիվանդության վարակման երկու դեպք։

«Այս տարի գրանցվել է  կարմրուկ հիվանդության  2 բերովի դեպք, մեկը՝ Ուկրաինայի քաղաքացի է, որը երբեք պատվաստում չի ստացել, վարակված եկել է Հայաստան և ախտանիշները դրսևորվել է այստեղ։ Ուկրաինուհին բավականին ուշ է դիմել բուժհաստատություն։ Նա Հայաստան է ժամանել փետրվարի 24-ին, բուժհաստատություն է դիմել մարտի 1-ին և բազմաթիվ շփումներ, հանդիպումներ է ունեցել, ուստի չի բացառվում, որ այդ մարդկանց շրջանում կունենանք կարմրուկի տարածում։ Մյուս դեպքով Վրաստանի քաղաքացի է: Վրաստանի 28-ամյա քաղաքացին ևս ունեցել է մեծ թվով շփումներ, այդ թվում՝ ուսանողների հետ, ուստի կանխատեսում ենք, որ նոր դեպքեր կունենանք, սակայն բոլոր կանխարգելիչ միջոցառումներն իրականացնում ենք, կոնտակտների շրջանակում պաստավաստումներ են արվում, որպեսզի հիվանդացության շրջանակը փոքրանա»,- ասաց Գայանե Սահակյանը։

Նա նշեց, որ Ուկրաինայում 2018 թվականին գրանցվել է կարմրուկի 30 հազար դեպք՝ 30 մահվան ելքով, Ֆիլիպիններում՝  13 հազար դեպք, Բրազիլիայում՝ 10500, Վրաստանում՝ նախորդ տարվա դեկտեմբերից սկսված գրանցվել է 3000 կարմրուկի դեպք։

ՀՀ ԱՆ իմունականխարգելման ազգային ծրագրի ղեկավարը կարևորեց նաև հիվանդության կանխարգելման համար պատվաստումների անհրաժեշտությունը։ Ըստ նրա՝ կարմրուկի պատվաստման 1 դեղաչափը բավարար է ողջ կյանքի համար, իսկ երկրորդ դեղաչափը ներարկվում է իմունիտետի բարձրացման համար։

«Սակայն վերջին 5 տարիների ընթացքում պատվաստումից  հրաժարվողների  միտում է նկատվում, որին հիմնականում նպաստում է սոցցանցերում արվող հակաքարոզչությունը»,- ասաց նա:

Աղավնի Սուքիասյան