Եվրոպայի թիվ մեկ նորարարական համալսարանի հետ պայմանագրեր կստորագրվեն. Արայիկ Հարությունյան. ՏԵՍԱՆՅՈՒԹ

Մարտի 4-ին աշխատանքային այցով Բրյուսել ժամանած վարչապետ Նիկոլ Փաշինյանը և կրթության և գիտության նախարար Արայիկ Հարությունյանն այցելել էին Լյուվենի կաթոլիկ համալսարան, որն ընդգրկված է աշխարհի լավագույն 100 համալսարանների ցանկում։

Factor.am-ի հետ զրույցում նախարար Հարությունյանը մանրամասնեց, թե Լյուվենի համալսարանի հետ համատեղ ինչ ծրագրեր են սպասվում. «Ֆլանդրիայի հետ ստորագրվել է լայն համագործակցության հուշագիր, և կոնկրետ Լյուվենի համալսարանի հետ ձեռք են բերվել կոնկրետ պայմանավորվածություններ։ Ես ևս մեկ անգամ էստեղի համալսարանների, գիտահետազոտական կենտրոնների ներկայացուցիչների հետ կմեկնեմ Լյուվենի համալսարան, որ հուշագրից հետո արդեն կոնկրետ պայմանագրեր ստորագրվեն։ Բացի այդ, Լյուվենի համալսարանը համատեղ ասպիրանտական ծրագրեր իրականացնելու առաջարկ է արել»։

Արայիկ Հարությունյանի տեղեկացմամբ՝ Լյուվենի համալսարանը Եվրոպայում թիվ մեկ նորարարական համալսարանն է, և ըստ նախարարի, Հայաստանի բարձրագույն կրթության ռեֆորմները տեղի են ունենում այն տրամաբանությամբ, որով զարգացել է Լյուվենի համալսարանը:

«Նրանցից շատ բան ունենք վերցնելու՝ սկսած բուհի կառավարումից, և վերջացրած կոնկրետ ծրագրերով, որ կարող են համատեղ իրականացվել։ Մի բան կարող եմ ասել, որ տեխնիկական հագեցվածությամբ Լյուվենի համալսարանը շատ առաջ է, և նույնիսկ Եվրոպայի բոլոր համալսարաններից է առաջ։ Բայց մասնագետների առումով և որոշ ուղղություններով մենք կարող ենք լավ գործընկեր դառնալ», – ասաց Արայիկ Հարությունյանը։

Մանրամասները՝ տեսանյութում:

Ռոբերտ Անանյան