Կառավարության կառուցվածքի նախագիծն ԱԺ-ում տեսել են եւ խորհուրդ են տվել՝ չհրապարակել

Չնայած այն բանին, որ կառավարության կառուցվածքի փոփոխությունների հարցը օրակարգ բերվեց դեռ անցած տարեվերջին, մինչ օրս անորոշ է, թե նախագիծը երբ է պաշտոնապես շրջանառվելու Ազգային ժողովում:

Սակայն Factor.am-ին հայտնի դարձավ, որ ոչ պաշտոնապես նախագիծն ուղարկվել է ԱԺ պետական իրավական հարցերի մշտական հանձնաժողով եւ հասանելի է եղել սահմանափակ թվով պատգամավորների համար:

Սակայն նրանք, ովքեր ծանոթացել են փաստաթղթին, խորհուրդ են տվել նման տեսքով այն չհանրայնացնել:

Factor.am-ի ուղիղ հարցին՝ կառավարության կառուցվածքի փոփոխությունների նախագիծը ոչ պաշտոնապես փոխանցվե՞լ է Ձեր հանձնաժողով, թե՝ ո՞չ, ԱԺ պետական իրավական հարցերի մշտական հանձնաժողովի նախագահ Վլադիմիր Վարդանյանը տվեց հաստատող պատասխան․

«Որոշակի առումով աշխատանքային տարբերակին ծանոթ եմ, բայց պաշտոնապես Ազգային ժողովում շրջանառության մեջ դրված չէ: Ներքին կարգով կարող է ներկայացվել ցանկացած փաստաթուղթ, բայց այն ոչինչ է, քանի դեռ պաշտոնապես չի շրջանառվել»,- ասաց նա:

Վլադիմիր Վարդանյանը հրաժարվեց նշել, թե իրեն փոխանցված փաստաթղթում ինչ անհամատեղելիություն է եղել, բայց ակնարկեց, որ այն դրական եզրակացության տալու արժանի փաստաթուղթ չի եղել:

«Չեմ կարող որեւէ բան ասել, որովհետեւ դա տարբերակներից մեկն է եղել, թե կառավարությունն ինչ կներկայացնի՝ դա կլինի վերջնական տարբերակը: Չեմ ուզենա այդ տարբարակի մասին խոսել, որը հասանելի է եղել ինձ: Փաստաթուղթը, որը զուրկ է լինելու իրավական որոշակիությունից, ունենալու է խնդիրներ, չի արժանանալու դրական արձագանքի»:

Մեր տեղեկություններով՝ նախագծի նախնական տարբերակը նույն անձանց ուղարկվել է երկու անգամ:

Վարդանյանից հետաքրքրվեցինք՝ քանի անգամ է իրեն այդ տարբերակն ուղարկվել:

«Աշխատանքային քննարկում կառավարության կառուցվածքի նախագծի վերաբերյալ ունեցել ենք, որոշակի հարցադրումներ եմ ներկայացրել եւ եղել են պատասխաններ: Աշխատանքային հանդիպումները լինում են պարբերաբար»,- եզրափակեց նա:

Նարեկ Կիրակոսյան