Լրատվամիջոցների ճնշող մեծամասնությունը լրատվամիջոցից վերածվում է քարոզչամիջոցի, դարձել են քաղաքական համակարգի մի մաս․ Աշոտ Մելիքյան․ ՏԵՍԱՆՅՈՒԹ

Ինֆորմացիոն դաշտի  ծայրահեղ քաղաքականացված լինելու հանգամանքը մենք պետք է դիտարկենք այն տեսանկյունից, որ լրատվամիջոցների ճնշող մեծամասնությունն այսօր կամաց-կամաց լրատվամիջոցից վերածվում է քարոզչամիջոցի և այն քաղաքական ուժերը, որոնք քաղաքական դաշտի հիմնական խաղացողներն են, իրենց ենթակա լրատվամիջոցներին դարձրել են քաղաքական համակարգի մի մաս։

Այս մասին այսօր «Կեղծ լուրերից մինչև ատելության խոսք․ անվերահսկելի մեդիատարա՞ծք, թե՞ վերահսկվող քարոզչություն» թեմայով քննարկման ժամանակ ասաց Խոսքի ազատության պաշտպանության կոմիտեի նախագահ Աշոտ Մելիքյանը։

«Մեծ հաշվով հիմա գնում է քաղաքական պայքար լրատվամիջոցների միջոցով և այս պարագայում շատ դժվար է խոսել այն ստանդարտների մասին, որոնք բնորոշ են լրատվամիջոցներին՝ թե՛ օրենսդրական կարգավորումների, թե՛ էթիկայի առումով։ Հետաքրքրական է, որ  օրենսդրական կարգավորումների անհրաժեշտության մասին խոսում է և իշխանությունը, և այն քարոզչամիջոցները, որոնց մեջքին կանգնած են քաղաքական ուժերը։ Դրա մասին խոսում են նաև մեդիափորձագետները»,- ասաց  Աշոտ Մելիքյանը՝ հիշեցնելով, որ անխուսափելի է լինելու օրենսդրական կարգավորումների վերաբերյալ տարբեր աշխատանքային խմբերի մոտեցումների բախումը, ինչը կարող է հանգեցնել այս հարցում լավագույն լուծումներին։

Խոսքի ազատության պաշտպանության կոմիտեի նախագահ Աշոտ Մելիքյանը նաև նկատեց, որ օրենսդրական կարգավորումները չպետք է լինեն այնպիսին, որ վնասեն խոսքի ազատությանը։

«Շատ զգույշ է պետք այս հարցին մոտենալ։ Անհրաժեշտ է մաքսիմալ ուսումնասիրել միջազգային փորձը, կիրառել աշխարհի լավագույն փորձը՝ զերծ մնալով սխալներից»,- նկատեց Մելիքյանը։

Մանրամասները՝ տեսանյութում։

Աղավնի Սուքիասյան