09.06.2026 | 00:17
Մարկո Ռուբիոն շնորհավորել է Փաշինյանին
Քաղաքական որոշ ուժերի նպատակը մեկն է՝ բերել ներկա իշխանություններին ճգնաժամի․ Բորիս Նավասարդյան․ ՏԵՍԱՆՅՈՒԹ
Հասարակություն
06.03.2019 | 14:41
Քաղաքական ուժերի մի մասը, որոնք ցանկանում են վերադառնալ մինչ 2018 թվականի ապրիլ-մայիս ամիսներին տիրող իրավճակը, պարտվել են ընտրական դաշտում և այժմ լրատվամիջոցներին ընտրելով որպես հիմնական հարթակ, ցանկանում են իրականացնել իրենց քաղաքական նպատակները։
Կարծում եմ, այս հաշվարկը նրանց կողմից բավականին ճիշտ է արվել, քանի որ թավշյա հեղափոխության շնորհիվ լրատվական դաշտը դարձավ բավականին պահանջարկված և այդ պահանջարկը քաղաքական ուժերի մի մասը փորձում է օգտագործել իր քաղաքական նպատակների համար։
Այս մասին այսօր հրավիրված «Կեղծ լուրերից մինչև ատելության խոսք․ անվերահսկելի մեդիատարա՞ծք, թե՞ վերահսկվող քարոզչություն» թեմայով քննարկման ժամանակ ասաց Երևանի մամուլի ակումբի նախագահ Բորիս Նավասարդյանը։
«Սա բերում է ուղղակի և անուղղակի սեփականության վերաբաշխման։ Այսինքն՝ քաղաքական ուժերը կա՛մ ձեռք են բերում, կա՛մ ստեղծում են նոր լրատվամիջոցներ, կա՛մ առանձին մասնավոր պատվերներով աշխատում են այլ լրատվամիջոցների հետ։ Սա բերում է մի իրավիճակի, որ լրատվական հոսքերի մեծ մասը վերահսկվում է քաղաքական այդ շրջանակների կողմից»,- ասաց Նավասարդյանը։
Վերջինիս խոսքով՝ եթե այդ քաղաքական շրջանակները նախկինում՝ մինչ ընտրությունները, ունեին ավելի բազմազան հարցերի շրջանակ, այժմ նրանց կողմից կա համախմբում մեկ հարցի շուրջ։
«Որքան էլ իրենք իրենց մեջ կարող են ունենալ հակասություններ, բայց հիմնական նպատակը մեկն է՝ բերել ներկա իշխանություններին ճգնաժամի։ Այդ ուղղությամբ բավականին համախմբված գործողություններ են կատարվում։ Սա ինչ-որ տեղ բնական գործընթաց է։ Ես կառաջարկեի այդ իրավիճակին վերաբերյալ գույները չխտացնել, և այն ընկալել որպես բնական, իսկ այն լրատվամիջոցները, որոնք ցանկանում են աշխատել չեզոք ուղղությամբ, պետք է հասկանան՝ ինչ են իրենք ուզում»,- նշեց Երևանի մամուլի ակումբի նախագահը։
Մանրամասները՝ տեսանյութում։
Աղավնի Սուքիասյան
