Հին երևանցու համար սրտի ցավ է, երբ տեսնում է, որ ամեն ինչ քանդում են. արվեստագետները՝ Խորենացի 13 հասցեի շենքի ապամոնտաժման մասին

Հին երևանցու համար սրտի ցավ է, երբ տեսնում է, որ ամեն ինչ քանդում են: Մարտի 5-ին լրագրողների հետ հանդիպմանն ասաց քանդակագործ Լևոն Թոքմաջյանը՝ անդրադառնալով Խորենացի 13 հասցեում գտնվող Կրթության և գիտության նախարարության նախկին շենքի ապամոնտաժմանը: Նրա խոսքով՝ թեպետ Երևանի գլխավոր ճարտարապետ Արթուր Մեսչյանը հայտարարել էր, որ այլևս ոչ մի շենք չի քանդվելու, այսօր կրկին ականատես ենք դառնում ցավալի իրականության:

«Ընդունենք, որ Խորենացի 13 հասցեում գտնվող այդ շենքը ճարտարապետական տեսակետից արժեքավոր շենքերի ցանկում չկա: Բայց իրենց հոգու ցուցակո՞ւմ էլ չկա»,- ասաց Լևոն Թոքմաջյանը:

Ըստ քանդակագործի՝ շենքի ճակատային մասը հետաքրքիր զարդանախշեր և ճարտարապետական լուծումներ ուներ, և այն քանդելը հաշվենկատության հարց է:

«Քանդում են մեր ազգային ճարտարապետական կոթողը և կողքին դնում սև ապակիներով էլիտար այլանդակություն: Մշակույթի փոխնախարարն ասում է՝ շենքը ցուցակում չկա, հետևաբար՝ նախարարը չի խառնվում։ Սա ի՞նչ է նշանակում»,- տարակուսեց Լևոն Թոքմաջյանը:

«Հայաստանի փոքրիկ երգիչների» գեղարվեստական ղեկավար Տիգրան Հեքեքյանն էլ կարևորում է օրենսդրական կարգավորումները, որպեսզի նման հարցերում դատողությունները պայմանավորված չլինեն անձերով կամ հույզերով:

«Երբ մարդիկ Երևան են գալիս, ինձ հարցնում են՝ ո՞ւր են ձեր հին շինությունները։ Տասնամյակներ առաջ, երբ մտա այդ շենք, մուտքից արդեն հիացա: Պատմական արժեքը միայն շենքը չէ, այլ միջավայրը։ Այսօր մենք ունենք քարակույտ: Նայում եմ մեր գերեզմանատներին, հիշում եմ Երևանի քաղաքաշինությունը, երբ նայում եմ Երևանին, հիշում եմ գերեզմանատները: Երբ մենք ինչ-որ բան կփոխենք մեր ուղեղներում՝ լինի ճարտարապետ, թե՝ հասարակ մարդ, այդ ժամանակ ինչ-որ բան կարող է փոխվել: Պետք է հասկանանք, որ վաղուց ժամանակն է արագ օրենսդրական կարգավորումներ տալ»,- հավելեց Հեքեքյանը:

Հիշեցնենք, որ Խորենացի 13 հասցեում գտնվող Կրթության և գիտության նախարարության նախկին շենքի ճակատային մասի քանդման աշխատանքները վերսկսվել են:

Մանրամասները՝ տեսանյութում:

Նելլի Մելքոնյան