Աննա Հակոբյանի ղեկավարած «Իմ քայլը» հիմնադրամում նվիրատուների անուններն առայժմ գաղտնի են պահում

Վարչապետի տիկին Աննա Հակոբյանի ղեկավարած «Իմ քայլը» հիմնադրամը շարունակում է գաղտնի պահել նվիրատուների ցանկը: Factor.am-ը գրավոր հարցում էր ուղարկել «Իմ քայլը» հիմնդարամ և խնդրել տրամադրել նվիրատուների ցանկը:

Հիմնադրամից, սակայն, մեր հարցմանը հրաժարվել էին պատասխանել՝ հետևյալ պատճառաբանությամբ:

«Ի պատասխան Ձեր հարցմանը, տեղեկացնում եմ, որ Հիմնադրամի նոր կայքը, որը պատրաստ կլինի առաջիկա 2-3 շաբաթվա ընթացքում, կունենա «Նվիրատուներ» բաժին։ Նշյալ բաժնում զետեղված կլինի նվիրատուների և նվիրաբերությունների մասին տեղեկատվություն՝ Հայաստանի Հանրապետության օրենսդրությանը համապատասխան»,- ասված է հիմնադրամի տնօրեն Հովհաննես Ղազարյանի՝ Factor.am-ին տրամադրած պատասխանում:

Տարօրինակ է, թե ինչու է հիմնադրամը ցանկանում մրցել լրատվամիջոցի հետ և առաջինը իր կայքում տեղադրել հրապարակման ենթակա այդ տեղեկատվությունը: Եվ, ի վերջո, հարց է առաջանում, եթե հիմնադրամը ցանկություն ունի այդ տեղեկությունները հրապարակել, ինչու առաջին իսկ հնարավորությունը չի օգտագործում:

Ի դեպ, նշենք, որ առկա է «Իմ քայլը» հիմնադրամի պաշտոնական կայքը՝ mystep.foundation, որտեղ վերջին թարմացումը եղել է Աննա Հակոբյանի մամուլի ասուլիսի վերաբերյալ:

Factor.am-ը իրավաբան Արա Ղազարյանից հետաքրքրվեց՝ արդյոք հիմնադրամը օրենք չի՞ խախտում նվիրատուների ցանկը չհրապարակելով: Վերջինս նշեց, որ «Հիմնադրամների մասին» ՀՀ օրենքի համաձայն՝ հիմադրամը մինչև այս տարվա մարտի 25-ը ժամանակ ունի հրապարակել նախորդ տարվա հաշվետվությունը: Այն պետք է պարունակի տեղեկություններ իրականացված ծրագրերի, ֆինանսավորման աղբյուրների, ֆինանսական տարում օգտագործված միջոցների ընդհանուր չափի և դրանցում կանոնադրական նպատակների իրականացմանն ուղղված ծախսերի չափի մասին, ներկայացնի հիմնադրի, հոգաբարձուների խորհրդի անդամների, կառավարչի և հիմնադրամի աշխատակազմում ընդգրկված անձանց անուններն ու ազգանունները, եթե նրանք օգտվել են հիմնադրամի միջոցներից և ծառայություններից հաշվետու տարվա ընթացքում»։

«Իմ քայլը» հիմնադրամի հաշվեհամարին գործունեության վեց ամսվա ընթացքում մուտք է եղել 859 մլն 55 հազար դրամ։ Այդ գումարից ծախսվել է 236 մլն դրամ, այս պահին առկա է 622 մլն դրամ մնացորդ։ Այս մասին փետրվարի 21-ին մամուլի ասուլիսի ժամանակ լրագրողների հետ զրույցում ասել էր Աննա Հակոբյանը:

Հիշեցնենք, որ մի քանի օր առաջ մեծ աղմուկ բարձրացավ վարչապետի տիկնոջ ղեկավարած մեկ այլ հիմնադրամի՝ «Ժպիտների քաղաք»-ի նվիրատուների ցանկի հետ կապված:

Հայկ Վարդանյան