16.01.2026 | 18:34
Տիմոշենկոյի նկատմամբ խափանման միջոց է ընտրվել գրավը
Ապրիլի 23-ը չի հռչակվի Քաղաքացու օր, ինքս տարակուսեցի, երբ կարդացի այդ հրապարակումը. Լիլիթ Մակունց. ՏԵՍԱՆՅՈՒԹ
Քաղաքականություն
04.03.2019 | 18:46
Factor TV-ի հարցազրույցը ԱԺ «Իմ քայլը» խմբակցության ղեկավար Լիլիթ Մակունցի հետ
– Տիկի՛ն Մակունց, «Իմ քայլը» խմբակցությունը մի քանի շաբաթ է՝ հանդիպումներ է ունենում տարբեր նախարարների և պետական այլ կառույցների ղեկավարների հետ: Ի՞նչ տվեցին այս հանդիպումները խմբակցությանը: Ձեզ հուզող հարցերի պատասխանները ստացա՞ք:
– Հանդիպումները գնահատում եմ շատ կարևոր և արդյունավետ՝ մի քանի կտրվածքով: Առաջին հերթին՝ խորհրդարանը գործարկում է այն վերահսկողական գործիքները, որին տիրապետում է: Կառավարությունը հաշվետվողականության նպատակով ներկայացնում է այն գործողություններն ու աշխատանքները, որոնք իրականացրել է այս ընթացքում: Պարզաբանում ենք ստանում նաև հանրային հնչեղություն ունեցող հարցերի վերաբերյալ:
– Հանդիպումները շարունակակա՞ն են լինելու, թե՞ այսքանով սահմանափակվեցին:
– Սահմանափակումներ չեն լինելու: Պարբերաբար կունենանք հանդիպումներ, բայց միայն հանդիպումները և ինչ-որ բաներ արձանագրելը բավարար չէ, դրանց արդյունքում պետք է աշխատանք կատարել: Այն տեղեկատվությունը, որը հավաքագրել ենք մեզ համար, դրանց ընթացք կտանք:
– Առաջիկայում հնարավո՞ր է, որ խմբակցությունը հանդիպի Պետական վերահսկողական ծառայության ղեկավար Դավիթ Սանասարյանի հետ, քանի որ նոր Հայաստանի առաջին կոռուպցիոն սկանդալը պայթեց հենց այդ կառույցում: ԱԱԾ-ն կալանավորել է ՊՎԾ երկու աշխատակցի:
– Ոչինչ չեմ բացառի: Այնքանով, որքանով մեր գործողությունները չեն խանգարի նախաքննությանը, դրանով էլ պայմանավորված կլինեն մեր գործողությունները: Այս պահին խմբակցությունից դեռ նման առաջարկ չեմ ստացել:
– Տիկի՛ն Մակունց, այսօր ԱԺ նախկին փոխնախագահ Արփինե Հովհաննիսյանը փաստաթղթեր է հրապարակել՝ փոխվարչապետ Մհեր Գրիգորյանի և ֆինանսների նախարար Ատոմ Ջանջուղազյանի կողմից ստորագրված, որի համաձայն՝ վարչապետից հանձնարարական կա մինչև մարտի 31-ը ներկայացնել 10 հազար աշխատակցի օպտիմալացման ծրագիր: Սրանք ի՞նչ կրճատումներ են, Դուք տեղյա՞կ եք, քանի որ Կառավարությունը դեռ որևէ կերպ չի արձագանքել:
– Դեռ չեմ հասցրել խորապես ուսումնասիրել, ինչպես Դուք նշեցիք՝ արձագանքող կողմը Կառավարությունն է: Եվ կտեսնենք, թե ինչպիսի արձագանք է տրվում:
– Մամուլը գրել էր, որ ապրիլի 23-ը պաշտոնապես հռչակվելու է Քաղաքացու օր, լինելու է ոչ աշխատանքային: Ըստ հրապարակման՝ դա պայմանավորված է այն հանգամանքով, որ այդ օրը Սերժ Սարգսյանը հրաժարական է տվել: Այս տեղեկությունները ճի՞շտ են:
– Ինքս տարակուսեցի, երբ կարդացի այդ հրապարակումը: Խմբակցության կողմից նման քննարկում չի եղել, որոշում չկա: Այսօր հետաքրքրվել եմ նաև «Քաղաքացիական պայմանագիր» կուսակցության վարչությունից, քանի որ մտածեցի՝ այնտեղ է նման բան քննարկվել, սակայն այնտեղից էլ ասացին, որ նման բան չկա: Նման քննարկում չի եղել ապրիլի 23-ը Քաղաքացու օր հռչակելու մասին:
Հարցազրույցն ամբողջությամբ՝ տեսանյութում:
Նարեկ Կիրակոսյան
