27.04.2024 | 02:29
ԶՈՒ-ին քաղաքական գործընթացների մեջ ներքաշելու փորձերը համարժեք իրավական գնահատականի կարժանանան. ՊՆ
«Մեր խիղճը հանգիստ է և պատրաստ ենք ամենակոշտ ձևով պատասխանատվություն կրել»․ Դավիթ Պետրոսյան
Հասարակություն
04.03.2019 | 14:14
«Ռեստարտ» նախաձեռնության անդամ Դավիթ Պետրոսյանը ֆեյսբուքյան ուղիղ եթերի ընթացքում անդրադարձել է մարտի 3-ի գիշերը տեղի ունեցած միջադեպին։ Նա նշել է, որ իրենք պատրաստ են իրենց գործողությունների համար պատասխանատվություն կրել և արածի համար չեն զղջում։
«Արդեն մի քանի ամիս է՝ տարբեր մարդիկ ամեն ինչ անում են, որպեսզի «Ռեստարտի» անդամներին հունից հանեն. անմիջականորեն վիրավորում են մեր ընտանիքի անդամներին և արժանապատվությունը: «Ռեստարտի» գործունեության հիմքում միշտ ընկած է եղել արժանապատիվ քաղաքացի ունենալու գաղափարախոսությունը։ Նարեկ Մալյանին երբեք չենք հայհոյել, բռնության չենք ենթարկել ու չենք էլ ենթարկելու: Մենք ողջունում ենք վարչապետի հայտարարությունն այն մասին, որ Հայաստանում բռնությունը երբեք չի ընդունվելու: Մենք ասել ենք, որ գործողությունն իրականացնելուց հետո ոստիկանություն ենք գնալու, բայց ոստիկանությունն ավելի շուտ է եկել»,- նշել է Դավիթ Պետրոսյանը։
Նրա խոսքով՝ թույլ չեն տալու, որ այս հարցը քաղաքական դառնա։
«Ընդհանրապես չենք փոշմանում։ Մեր խիղճը հիմա շատ հանգիստ է։ Մենք մեր արժանապատվությունն ու ինքնասիրությունը երբեք ավելի ցածր չենք գնահատի, քան մեր հանրային հեղինակությունն է։ Մենք հանրային հեղինակության համար չենք աշխատում: Պատրաստ ենք ամենակոշտ ձևով պատասխանատվություն կրել։ Պայքարել ենք ազատ, անկախ ու մարդակենտրոն Հայաստանում ապրելու համար, և եթե խախտել ենք այդ սկզբունքները, պատրաստ ենք պատասխանատվություն կրել»,- ընդգծել է Դավիթ Պետրոսյանը:
Նելլի Մելքոնյան
