Ինձ մեղավոր եմ զգում, որ իմ կոչով մարդիկ հրապարակ էին եկել, ու այսօր ողջ չեն. Արամ Սարգսյան. ՏԵՍԱՆՅՈՒԹ

Առաջին անգամ իշխանական միտինգի մասնակցող Ազգային ժողովի նախկին պատգամավոր Արամ Սարգսյանի խոսքով՝ Մարտի 1-ն իր դառը հետքն է թողել հայ իրականության պատմության մեջ, և ինքը զոհերի ու նրանց հարազատների առաջ իրեն մեղավոր է զգում, որովհետև մարդիկ հրապարակ էին եկել նաև իր կոչերով, սակայն այսօր նրանք չկան։

«Այն մարդիկ, որոնք զոհվեցին, իրենց մեծ ներդրումն ունեն Հայաստանն այդ ծանր վիճակից պոկելու ու առաջընթաց ապահովելու համար»,-այսօր Ազատության հրապարակում Մարտի 1-ի զոհերի հիշատակին նվիրված հանրահավաք-երթի ժամանակ լրագրողների հետ զրույցում ասաց Սարգսյանը։

Խոսելով Մարտի 1-ի ոճրագործության բացահայտման ուղղությամբ գործող իշխանությունների կողմից իրականացվող աշխատանքների մասին՝ Արամ Սարգսյանը նշեց, որ նրանք ակնհայտ ցույց են տալիս, որ ուզում են հետամուտ լինել այդ գործի բացահայտմանը։

«Արվում են քայլեր, որոնց դեմ նաև արտաքին քաղաքական դեմարշներ են տեղի ունենում, ինչը մենք տեսնում ենք մեր ռազմավարական գործընկերության կողմից, բայց գործող իշխանությունը հակված է Մարտի 1-ն ամբողջական բացահայտել և այդ հարցում իր դիրքերում ամուր կանգնած է։ Սա այն հարցն է, որի վերաբերյալ ՀՀ-ի որևէ իշխանություն չի փորձել լուրջ հույս ներշնչել հանրությանը, որ ինքը հակված է լույս սփռել Մարտի 1-ի բացահայտման ուղղությամբ»,- ասաց Արամ Սարգսյանը՝ նշելով, որ այդ ճանապարհին թույլ են տրվում որոշակի սխալներ, որոնք, սակայն, գալիս են նաև անփորձությունից։

Մանրամասները՝ տեսանյութում։

Աղավնի Սուքիասյան