03.09.2026 | 23:17
Հայտնի են Ֆրանսիայի դեսպանատան ընդունելությունից հետո գրանցված թունավորման հնարավոր պատճառները. ՍԱՏՄ-ն մանրամասնել է
ԲՀԿ-ն չի մասնակցելու վարչապետի հայտարարած մարտի 1-ի երթին. իրենք առանձին են անելու
Քաղաքականություն
27.02.2019 | 17:32
Ազգային ժողովի «Բարգավաճ Հայաստան» խմբակցությունը չի մասնակցելու վարչապետ Նիկոլ Փաշինյանի հայտարարած մարտի 1-ի երթին: ԲՀԿ-ականները մարտի 1-ին՝ կեսօրին, առանձին երթ են կազմակերպելու Գագիկ Ծառուկյանին պատկանող կոնյակի գործարանի հարակից տարածքից դեպի Մյասնիկյանի արձանի տարածք, որտեղ հարգանքի տուրք են մատուցելու զոհերի հիշատակին:
Տեղեկությունը Factor.am-ին փոխանցեցին ԲՀԿ-ի մեր աղբյուրները:
Թեմայի շուրջ Factor.am-ը պարզաբանում խնդրեց ԲՀԿ-ական պատգամավոր, Գագիկ Ծառուկյանի մամուլի խոսնակ Իվետա Տոնոյանից: Նա մեզ հետ զրույցում ասաց, որ Նիկոլ Փաշինյանի հայտարարած երթին մասնակցելու հարցը կուսակցությունում չի քննարկվել:
«Կոնկրետ Նիկոլ Փաշինյանի հայտարարած երթին մասնակցելու քննարկում մենք չենք ունեցել, բայց ինչպես ամեն տարի, այս տարի ևս մենք հարգանքի տուրք ենք մատուցելու զոհերի հիշատակին»,- նշեց նա:
Ճշտող հարցին՝ Գագիկ Ծառուկյանը ևս մասնակցելո՞ւ է այդ միջոցառմանը, Տոնոյանը պատասխանեց, որ պարզ չէ: «Այս պահին դեռևս տեղեկություն չունեմ պարոն Ծառուկյանի մասնակցության մասին: Քննարկում չեմ ունեցել նրա հետ»,- եզրափակեց նա:
Մի քանի օր առաջ ՀՀ վարչապետ Նիկոլ Փաշինյանը ֆեյսբուքյան իր էջի ուղիղ եթերում հայտարարել էր, որ Մարտի 1-ի իրադարձությունների 11-րդ տարին կնշանավորվի քաղաքացիական հզոր երթով՝ Ազատության հրապարակից մինչև Մյասնիկյանի հուշարձան: Այդ օրը վարչապետը հանդես է գալու նաև ուղերձով:
ԱԺ «Լուսավոր Հայաստան» խմբակցությունից ընդհանրապես չեն հստակեցնում՝ մասնակցելո՞ւ են մարտի 1-ի երթին, թե՝ ոչ: Խմբակցության խոսնակ Անի Սամսոնյանը Factor.am-ին տեղեկացրեց, որ առաջիկայում հայտարարություն կտարածեն:
Ավելի վաղ էլ ՀՀ նախագահ Արմեն Սարգսյանի օգնական Հասմիկ Պետրոսյանը, Factor.am-ի հարցին պատասխանելով, նշել էր, որ այս պահին նախագահի օրակարգում երթին մասնակցելու որոշում չկա: Արմեն Սարգսյանը, սակայն, զոհերի հիշատակին հարգանքի տուրք մատուցելու է:
Նարեկ Կիրակոսյան
