03.09.2026 | 23:17
Հայտնի են Ֆրանսիայի դեսպանատան ընդունելությունից հետո գրանցված թունավորման հնարավոր պատճառները. ՍԱՏՄ-ն մանրամասնել է
Հրաձգության հանրապետական մրցույթում 3-րդ տարին անընդմեջ հաղթում է ԿԳՆ թիմը
Հասարակություն
26.02.2019 | 17:42
ՀՀ սպորտի և երիտասարդության հարցերի նախարարությունում այսօր տեղի է ունեցել պետական մարմինների աշխատակիցների միջև հրաձգության հանրապետական մրցույթի հաղթողների և մրցանակակիրների պարգևատրման արարողությունը: Արդեն 3-րդ տարին անընդմեջ թիմային հաշվարկով 1-ին տեղը գրավում են ՀՀ կրթության և գիտության նախարարության տղամարդկանց և կանանց թիմերը: Հաղթողներին շնորհավորել է ՀՀ սպորտի և երիտասարդության հարցերի նախարարի առաջին տեղակալ, նախարարի պաշտոնակատար Գաբրիել Ղազարյանը՝ բարձր գնահատելով պետական մարմինների աշխատակիցների մասնակցությունը մրցույթին: Նրա խոսքով՝ հեռանկարային ծրագրեր կան այլ մարզաձևերից ևս նմանատիպ մրցույթներ անցկացնել՝ ակնկալելով պետական մարմինների աշխատակիցների ակտիվ մասնակցությունը դրանց:
Նշենք, որ տղամարդկանց անհատական պայքարում 1-ին տեղը գրավել է ԿԳՆ լրացուցիչ և շարունակական կրթության բաժնի գլխավոր մասնագետ Ռուբեն Ասատրյանը, իսկ կանանց պայքարում՝ ՀՀ արդարադատության նախարարության ներկայացուցիչ Սուսաննա Դավթյանը: ԿԳՆ արտաքին կապերի և սփյուռքի վարչության I կարգի մասնագետ Մերի Մարտիրոսյանն արժանացել է 3-րդ տեղի մրցանակին: ԿԳՆ թիմում ընդգրկված էին՝ ԿԳՆ գլխավոր քարտուղարի տեղակալ Արա Էդոյանը, մարզառազմական և արտաուսումնական դաստիարակության վարչության պետ Արկադի Պետրոսյանը, գնումների և հաշվապահական հաշվառման վարչության պետ Արմեն Ավետիսյանը, իրավաբանական վարչության գլխավոր մասնագետ Արտաշես Դանիելյանը, արտաքին կապերի և սփյուռքի վարչության գլխավոր մասնագետ Կարինե Սմբատյանը, անձնակազմի կառավարման վարչության գլխավոր մասնագետ Նելլի Նազարյանը: Բոլոր մրցանակակիրներին հանձնվել են ՀՀ սպորտի և երիտասարդության հարցերի նախարարության մեդալներ, գավաթներ և հուշանվերներ:
Մրցույթին մասնակցել է ՀՀ նախագահի, ՀՀ կառավարության և ՀՀ Ազգային ժողովի աշխատակազմերի, ՀՀ նախարարությունների, ՀՀ կառավարության ենթակա մարմինների և ՀՀ մարզպետարանների 32 թիմի 217 աշխատակից:
