Նախարարներին ԱԺ հաշվետվության են հրավիրում նաև ընդդիմադիրները

Ազգային ժողովում շարունակում են գործադիր մարմնի տարբեր ներկայացուցիչների հրավիրել խորհրդարան և հաշվետվություններ պահանջել:

Factor.am-ին հայտնի դարձավ, որ նախարարներին ԱԺ «բերման ենթարկելու» գործընթաց են սկսել նաև հանձնաժողովների ԲՀԿ-ական նախագահները: Մասնավորապես, ԱԺ ընդդիմադիր «Բարգավաճ Հայաստան» խմբակցության պատգամավոր, Տարածաշրջանային և եվրասիական ինտեգրման հարցերի մշտական հանձնաժողովի նախագահ Միքայել Մելքումյանը պատրաստվում է առաջիկայում իր ղեկավարած հանձնաժողով հրավիրել տնտեսական զարգացման և ներդրումների նախարար Տիգրան Խաչատրյանին:

Տեղեկությունը Factor.am-ի հետ զրույցում հաստատեց նաև Միքայել Մելքումյանը: Նա մեր հարցին ի պատասխան ասաց, որ քննարկելու են ԵՏՄ-ի հետ կապված հարցեր: Այսօր էլ ԲՀԿ-ական մեկ այլ պատգամավոր, Մարդու իրավունքերի պաշտպանության և հանրային հարցերի մշտական հանձնաժողովի նախագահ Նաիրա Զոհրաբյանն է արդարադատության նախարարին հրավիրել իր ղեկավարած հանձնաժողով: Մինչ այդ, սակայն, նախարարի հետ եղել էր աշխատանքային փակ հանդիպում:

Հիշեցնենք, որ որոշ ժամանակ առաջ էլ «Լուսավոր Հայաստան» խմբակցությունն էր ԱԳ նախարարին հրավիրել փակ հանդիպման: Նրանք քննարկել էին արտաքին ոլորտին վերաբերվող հարցեր:

Հավելենք, որ բացի այս, կառավարության ներկայացուցիչների հետ հանդիպումներ ունեցել է «Իմ քայլը» խմբակցությունը: Պատգամավորների հետ հանդիպել են առողջապահության նախարարը, ֆինանսների նախարարը, ՊԵԿ նախագահը, տրանսպորտի, կապի և ՏՏ նախարարը: Առաջիկայում խմբակցությունը հանդիպումներ է ունենալու Սուրեն Պապիկյանի, Արայիկ Հարությունյանի և ՀՀ ոստիկանապետի հետ:

Նարեկ Կիրակոսյան