ԱԺ պատգամավորներից ովքե՞ր են ստացել պետհամարանիշներ

Ազգային ժողովի «Իմ քայլը» խմբակցության որոշ պատգամավորներ հրաժարվել են պատգամավորներին տրվող պետհամարանիշներից: Factor.am-ը գրավոր հարցում էր ուղարկել ՀՀ ոստիկանություն՝ խնդրելով տրամադրել ԱԺ երեք խմբակցություններից այն պատգամավորների անունները, որոնք հրաժարվել են պետհամարանիշներից: Ոստիկանությունը, մեր գրավոր հարցմանն ի պատասխան, տրամադրել է այն պատգամավորների անունները, որոնք ստացել են պատգամավորական պետհամարանիշներ:

Եվ այսպես՝ ԱԺ երեք խմբակցությունների պատգամավորներից մինչև փետրվարի 19-ը «HH 11» պետհամարանիշներ ստացել են իշխանական «Իմ քայլից»՝ պատգամավորներ Ալեն Սիմոնյանը, Արմեն Փամբուխչյանը, Շիրակ Թորոսյանը, Հովհաննես Իգիթյանը, Սիսակ Գաբրիելյանը, Տիգրան Ուլիխանյանը, Հայկ Կոնջորյանը, Հրաչյա Հակոբյանը, Գոռ Գևորգյանը, Գևորգ Պապոյանը, Սերգեյ Ատոմյանը, Վարազդատ Կարապետյանը, Թագուհի Թովմասյանը, Արտաշես Պետրոսյանը, Վաղարշակ Հակոբյանը, Կարեն Սարուխանյանը, Տիգրան Կարապետյանը, Վահե Ղալումյանը: Այսպիսով՝ խմբակցության 88 պատգամավորից դեռևս 18-ն են ստացել պատգամավորի համար նախատեսված պետհամարանիշներ:

ԱԺ «Բարգավաճ Հայաստան» խմբակցությունից պետհամարանիշներ ստացել են պատգամավորներ Միքայել Մելքումյանը, Տիգրան Ուրիխանյանը, Իվետա Տոնոյանը, Գևորգ Պետրոսյանը, Սերգեյ Բագրատյանը, Արտյոմ Ծառուկյանը, Կարինե Պողոսյանը, Սողոմոն Սողոմոնյանը, Վարդան Վարդանյանը, Տիգրան Ստեփանյանը, Քաջիկ Գևորգյանը, Արայիկ Աղաբաբյանը, Նորա Առուստամյանը, Հրանտ Մադաթյանը, Արթուր Դալլաքյանը, Գագիկ Ծառուկյանը, Վարդան Ղուկասյանը, Նաիրա Զոհրաբյանը: 26 պատգամավոր ունեցող «Բարգավաճ Հայաստան» խմբակցությունից նույնպես 18 պատգամավոր է ստացել պետհամարանիշ:

«Լուսավոր Հայաստան» խմբակցության 18 պատգամավորից պետհամարանիշներ ստացել են 9 պատգամավորներ՝ Արման Բաբաջանյանը, Արկադի Խաչատրյանը, Արմեն Եղիազարյանը, Սարգիս Ալեքսանյանը, Գուրգեն Բաղդասարյանը, Գևորգ Գորգիսյանը, Էդմոն Մարուքյանը, Էդվարդ Անդրեասյանը, Ռուբիկ Ստեփանյանը:

Տեղեկացնենք, որ հանձնաժողովների նախագահները, ԱԺ փոխնախագահներն ու խմբակցության ղեկավարները պետհամարանիշները ստանում են ծառայողական մեքենաների հետ միասին: Հայտնի է նաև, որ «Իմ քայլից» պատգամավորներ Հայկ Գևորգյանը, Սիփան Փաշինյանը և Էդգար Առաքելյանը հրաժարվել են պետհամարանիշներից:

Շողիկ Գալստյան