Քաղաքականություն
20.02.2019 | 15:40«Իմ քայլը» խորհրդարանական խմբակցության ղեկավար Լիլիթ Մակունցը վստահեցնում է, որ պաշտոնյաների հետ հանդիպումների շարքը խմբակցությունում շարունակվելու է: Փետրվարի 20-ին լրագրողների հետ զրույցում պտասխանելով հարցին՝ նախատեսո՞ւմ են ԱԺ հրավիրել նաև ոստիկանապետ Վալերի Օսիպյանին կամ ԱԱԾ տնօրեն Արթուր Վանեցյանին, Լիլիթ Մակունցն ասաց. «Իհարկե նախատեսում ենք: Մյուս շաբաթ նախատեսում ենք ոստիկանապետին հրավիրել, դա կա մեր օրակարգում: Պարզապես այս ընթացքում մեր խմբակցությունից գործուղումներ ունեինք, և ուզում էինք, որ հնարավորինս շատ պատգամավորներ ներկա լինեն այդ հանդիպմանը»:
Իսկ այս շաբաթ նախատեսում են խմբակցության պատգամավորների հետ հանդիպման հրավիրել ԿԳ նախարար Արայիկ Հարությունյանին ու տրանսպորտի, կապի և ՏՏ նախարար Հակոբ Արշակյանին, բայց, հնարավոր է, հետաձգեն՝ կապված դահլիճի զբաղվածության հետ:
Լրագրողները հետաքրքրվեցին նաև, թե խմբակցությունում ինչպե՞ս են արձագանքել Պետական վերահսկողական ծառայության պետի ենթադրյալ չարաշահումների վերաբերյալ՝ «Դավիթ Սանասարյանը պետական մակարդակով բիզնես է խլում» վերտառությամբ հոդվածին: Լիլիթ Մակունցն ասաց՝ դեռ չի հասցրել ծանոթանալ հոդվածին: «Կծանոթանամ և կարծիքս կհայտնեմ: Երբ ծանոթանամ նյութին, հասկանամ՝ ինչ է տեղի ունենում, այդ ժամանակ նաև խմբակցությունով կքննարկենք, և խմբակցության դիրքորոշումը կկարողանամ հայտնել միայն այդ քննարկումից հետո»,- ասաց Մակունցը:
Ինչ վերաբերում է նախկին նախագահ Սերժ Սարգսյանի եղբոր՝ Ալեքսանդր Սարգսյանի կողմից 18.5 մլն դոլար բյուջե վերադարձնելուն, Մակունցը նախընտրեց չմեկնաբանել. «Այն հարցերը, որոնք այս պահին գտնվում են նախաքննական գործընթացում և այս պարագայում գործադիրի տիրույթում են, ես զերծ կմնամ որևէ մեկնաբանություններից: Առավել ևս, որ հիմա իմ հնչեցրած տեսակետը դիտվելու է որպես խմբակցության տեսակետ: Այս պահին որևէ բան չեմ կարող ասել»:
Մանրամասները՝ տեսանյութում:
