08.03.2026 | 10:12
Հանրապետության մի շարք տարածաշրջաններում ձյուն է տեղում
Լավ կլինի՝ Էդմոն Մարուքյանը մտածի, թե ինքն ինչպիսին պետք է լինի. Լենա Նազարյան. ՏԵՍԱՆՅՈՒԹ
Քաղաքականություն
18.02.2019 | 11:52
ՀՀ ԱԺ փոխնախագահ Լենա Նազարյանը կարծում է, որ ընդդիմությունը դեմ քվեարկեց Կառավարության ծրագրին, քանի որ առաջին անգամ կարողացավ ազատ գործել:
«Դեմ քվեարկեցին ոչ թե այն պատճառով, որ այն վատն էր, այլ այն պատճառով, որ նրանք գործեցին ընդդիմադիր, ազատ: Գուցե առաջին անգամ քաղաքական դաշտում ընդդիմադիրները կարողացան ազատ գործել»,- փետրվարի 18-ին խորհրդարանական ճեպազրույցների ժամանակ ասաց Լենա Նազարյանը:
Հարցին, թե ինչո՞ւ իշխանությունը չցանկացավ լսել ԲՀԿ-ին և նրա առաջարկները մյուս ընդդիմադիր ուժի հետ քննարկել ու ներառել ծրագրում, քանի որ ԲՀԿ-ն ծրագրի քննարկման օրերին պնդում էր, որ կողմ կքվեարկի ծրագրին, եթե իրենց առաջարկները տեղ գտնեն դրանում կամ գոնե բանավոր պայմանավորվածություն լինի այդ մասին, Նազարյանը պատասխանեց. «Եթե ունի առաջարկներ, ապա հնարավորություն ունի նաև առաջիկայում՝ գործողությունների ծրագրերի քննարկման ժամանակ ներկայացնելու, և եթե լավ առաջարկներ են, վստահ եմ, որ այդ փուլում Կառավարությունը կներառի դրանք»:
Խոսելով ընդդիմության քննադատությունների մասին՝ ԱԺ փոխնախագահն ասաց, որ դրանք բովանդակային չէին, և երբ ինքը փորձում է հիշել այդ քննադատությունները, ապա միակ բառը, որ մտաբերում է՝ «մուննաթ գալն է»:
«Իսկապես, մի փոքր սնանկ էր նրանց կողմից հնչեցրած քննադատությունը», – ասաց Նազարյանը: Նա նաև հայտարարեց, որ Էդմոն Մարուքյանն իրավունք չունի որոշել, թե Նիկոլ Փաշինյանն ինչպիսի՞ քաղաքական գործիչ պետք է լինի. «Լավ կլինի՝ Էդմոն Մարուքյանը մտածի, թե ինքն ինչպիսի քաղաքական գործիչ պետք է լինի»:
Մանրամասները՝ տեսանյութում:
Նարեկ Կիրակոսյան
