02.07.2026 | 16:32
ՔԿ-ն մանրամասներ է հայտնում գնդապետ Էդիկ Մալոյանի ձերբակալությունից
Վարչապետի հայտարարությունը, որ ինքը չի կարող ներկայացնել Արցախի ժողովրդին, պետք է ամրագրել օրենքով․ Կիրո Մանոյան
Քաղաքականություն
15.02.2019 | 17:06
«Հայաստանի և Ադրբեջանի ղեկավարների հանդիպումները թեև բանակցություններ չեն, բայց, կարծես թե, դրանց արդյունքում եկել են այնպիսի մի հանգրվանի, որ Մադրիդյան սկզբունքներն այլևս գոյություն չունեն»,- այս մասին այսօր հրավիրված մամուլի ասուլիսի ժամանակ ասաց ՀՅԴ Բյուրոյի Հայ դատի և քաղաքական հարցերի գրասենյակի ղեկավար Կիրո Մանոյանը՝ հղում անելով վարչապետի խոսնակ Վլադիմիր Կարապետյանի՝ «ո’չ հայկական կողմն է դրանց մասին խոսում, ո’չ ադրբեջանական կողմը, ո’չ էլ միջնորդները» արտահայտությանը։
Ըստ Մանոյանի՝ այս փուլում շատ զգուշավոր է պետք լինել հաճախ հնչեցվող հարցերից մեկի՝ Արցախի և Հայաստանի վերամիավորման խնդրի վերաբերյալ, քանի որ դրան միանգամից հասնել հնարավոր չէ, հետևաբար առաջարկում են կնքել Հայաստան-Արցախ ռազմաքաղաքական դաշինք:
«Նման պայմանագրի անհրաժեշտության մասին մենք արդեն 10-12 տարի բարձրաձայնում ենք: Հիմա առավել քան կարևոր է այն, որ վարչապետի արած հայտարարությունները պետք է օրենքով ամրագրել, այն է՝ Հայաստանի վարչապետը չի կարող ներկայացնել Արցախի ժողովրդին, Հայաստանը չի կարող կարգավորման բանակցություններում փոխարինել Արցախին: Այս ամենը չպետք է զուտ հայտարարություններ լինեն, այլ պետք է օրենքով ամրագրվեն»,- ասաց Մանոյանը։
Անդրադառնալով Փաշինյանի այն հայտարարությանը, որ «Տարածքներ` խաղաղության դիմաց» բանաձևը չի կարող քննարկվել և դրա վերաբերյալ ադրբեջանական կողմի արձագանքին` Կիրո Մանոյանը նշեց, որ Ալիևը շփոթմունքի մեջ է, քանի որ ՀՀ իշխանություններից միայն Լևոն Տեր-Պետրոսյանն է խոսել «Խաղաղության դիմաց` տարածքներ» բանաձևից, ինչի պատճառով ստիպված եղավ իր շրջապատի ճնշումների արդյունքում հրաժարական տալ:
«Դրանից հետո որևէ իշխանություն, այդ թվում՝ Փաշինյանը, նման բան չի հայտարարել: Հիմք չկա ասելու, որ ինչ-որ բան կհաջողվի կորզել, բայց մենք Ադրբեջանին ակամայից աջակցում ենք, որ նա իր վարկը շտկի, թե կարելի է, Հայաստանի հետ խոսելով, Ադրբեջանը մի քիչ խելոք նստի, կարելի է նույնիսկ, առանց միջնորդների մասնակցության, երկուսով խոսեն: Եվ սա դրական իմիջ է ստեղծում Ադրբեջանի և դրա նախագահի նկատմամբ, ես կասեի՝ սա նրանց նվիրում ենք»,- ասաց նա։
Դաշնակցական գործիչը խոսեց նաև երեկ Ազգային ժողովում ընդունված Կառավարության հնգամյան ծրագրի մասին և ընդգծեց, որ տարօրինակ է, որ ըստ այդ ծրագրի, Հայաստանը շարունակելու է ԱՄՆ-ի հետ երկխոսությունը տարածաշրջանում կայունության պահպանման գծով։
«Անհասկանալի է, թե ինչու միայն պետք է Միացյալ Նահանգների հետ ՀՀ-ն բանակցի, քննարկումներ կատարի տարածաշրջանում կայունության պահպանման գծով: Մանավանդ, որ Միացյալ Նահանգները տարածաշրջանում չէ, տարածաշրջանի երկրների հետ պետք է որ դա արվի»,- ասաց Կիրո Մանոյանը։
Աղավնի Սուքիասյան
