Տնտեսություն
08.02.2019 | 13:51«Ազգային ժողովի «Բարգավաճ Հայաստան» խմբակցությունը քննարկում է Կառավարության ծրագիրը. հպանցիկ անցնել և կարծիք հայտնել չեն կարող»,- այս մասին այսօր Ազգային ժողովում լրագրողների հետ զրույցում ասաց ԲՀԿ-ական պատգամավոր Միքայել Մելքումյանը՝ նշելով, որ հստակ այժմ կարող է խոսել միայն մի բանի մասին։
«Մեկ բան ես կարող եմ ասել, մեկ դրույթ՝ անցյալ տարի ես երկու անգամ օրենքի նախագիծ էի դրել շրջանառության մեջ, որ շրջանառության հարկի շեմը չիջնի 115 մլն դրամից, հունվարի 1-ից, փաստորեն, իջել է, 58.35 մլն է, իսկ դա գիտեք, որ փոքր ու միջին բիզնեսի համար շատ կենսական նշանակություն ունի, որովհետև հարկման ռեժիմ է փոխվում: Եվ ես նայում եմ ուրախությամբ, որ այդ 115 մլն-ը պահպանվում է, որ կառավարության ծրագրում կա և Հարկային օրենսգրքով է։ Բայց ինձ մոտ մի հետաքրքիր հարց է առաջանում՝ ես մի քանի ամիս առաջ գրել էի՝ պահպանել, չմերժել, հիմա պահպանում է։ Դեռ այսքանը»,- ասաց Մելքումյանը:
Պատգամավորի խոսքով՝ երկրում կատարվել են իրադարձություններ՝ կապված կոռուպցիայի, արհեստական մենաշնորհների հաղթահարման հետ, որոնք իսկապես հաղթահարվել են, բայց կյանքը ցույց է տալիս, որ դեռ միջոցառումներ կան, որոնք պետք է կատարվեն, հետևաբար ներդրումների գալը հաշվիչի նման չէ, որ երեկոյան անջատվեց, առավոտ եկավ. «Մարդիկ պետք է տեսնեն, որ ներդրումների անվտանգությունը և նվազագույն շահութաբերությունը երաշխավորված է: Այդտեղ լուրջ խնդիրներ կան՝ կապված հատկապես դատաիրավական համակարգի ռեալ անկախության հետ: Բիզնեսը սիրում է, որ կարճ ժամկետներում վճիռները կայացվեն։ Խնդիրներ կան կապված ֆինանսական շուկայի զարգացած լինելու հետ»։
Հարցին այս Կառավարության ծրագրում թվեր կա՞ն, պատգամավորը պատասխանեց․ «Թվեր կան, որ կան, թվեր էլ կան, որ չկան․ մի երկու թիվ կա, օրինակ, համախառն ներքին արդյունքի 5 տոկոս կամ, որ ասում են, որ արտահանման կշիռը ՀՆԱ-ում 2023 թվականին պետք է լինի 43-45 տոկոս, հիմա 23 տոկոս է․․․Մի քանի թվեր կան»,- ասաց պատգամավորը։
Մանրամասները՝ տեսանյութում։
Աղավնի Սուքիասյան
