15.01.2025 | 23:34
Իսրայելն ու ՀԱՄԱՍ-ը հրադադարի համաձայնագիր են ստորագրել
Պարտք է կուտակվում, թե՝ ոչ, հիմա քննարկվում է. Վախթանգ Միրումյանը՝ գազի 15 դոլար թանկացման մասին. ՏԵՍԱՆՅՈՒԹ
Տնտեսություն
06.02.2019 | 12:33
Ինչպես հայտնի է ռուսական «Գազպրոմ» ընկերությունը Հայաստանի համար գազի սակագինը հունվարի 1-ից թանկացրել է 15 դոլարով՝ 1000 խ/մ-ի համար գին սահմանելով 165 դոլար, նախկին 150-ի փոխարեն։ Մամուլում տեղեկություններ են շրջանառվում, որ 15 դոլարը վճարելու է ոչ թե «Գազպրոմ Արմենիան», այլ ՀՀ քաղաքացին, և հետագայում Հայաստանն այդ պարտքի դիմաց զիջելու է էներգետիկ որևէ հզորություն։
«Գազպրոմ Արմենիա» ընկերության գլխավոր տնօրենի տեղակալ Վախթանգ Միրումյանն այսօր լրագրողների հետ զրույցում չբացառեց այսպիսի զարգացումը։ Արդյոք 15 դոլարը որպես պա՞րտք է կուտակվում, հարցին պարոն Միրումյանը պատասխանեց․ «Պարտք է կուտակվում, պարտք չի կուտակվում, թե ինչպես պետք է իրականացվի ֆինանսատնտեսական գործունեությունը, բոլոր հարցերը հիմա քննարկվում են։ Բոլոր ուղղություններով՝ այդ թվում, թե՛ կապիտալ նորոգումների, թե՛ կորուստների, թե՛ ներդրումային ծրագրի ուղղություններով քննարկումները շարունակվում են, որ մի կողմից դա չվնասի ընկերության գործունեությանը, մյուս կողմից՝ չհանգեցնի ոչ ցանկալի արդյունքների»։
Միրումյանը նաև նշեց, որ «Գազպրոմ Արմենիան» ոչ թե բանակցային կողմ է, այլ մասնակցում է պետական կառույցների մասնակցությամբ ընթացող քննարկումներին։ Ռուսական ընկերության ներկայացուցիչը նշեց, որ գազի գնի շուրջ բանակցությունների ժամկետ է սահմանված 2 ամիսը, բայց և չի բացառում, որ դրանք կարող են ավելի երկար տևել։
Ռոբերտ Անանյան
