13.12.2025 | 22:20
Ֆրանսիան հաղթեց «Մանկական Եվրատեսիլ»-ում
Շախմատը դպրոցական առարկայացանկից դուրս չի գալու. Արայիկ Հարությունյան
Հասարակություն
01.02.2019 | 13:39
Ուսուցիչների հմտությունները զարգացնելու համար վերապատրաստման ծրագրեր են նախատեսվում: Փետրվարի 1-ին լրագրողների հետ զրույցում այս մասին ասաց ՀՀ կրթության և գիտության նախարար Արայիկ Հարությունյանը:
«Մեր հասարակության շրջանում բանավիճելու, բանակցելու հմտությունների բացակայությունը կամ պակասը երբեմն համակեցության կանոնների խախտման է հանգեցնում։ Այս մեթոդների կիրառումը թույլ կտա տասնամյակներով սերմանված արատներից հրաժարվել»,- ընդգծեց Արայիկ Հարությունյանը: Նշենք, որ այսօր ՀՀ կրթության և գիտության նախարարության ու Հայաստանում Մեծ Բրիտանիայի և Հյուսիսային Իռլանդիայի Միացյալ Թագավորության միջև համագործակցության հուշագիր է ստորագրվել, որով նախատեսվում է, մասնավորապես, Հայաստանի մի շարք համայնքներում անգլերենի ակումբների ստեղծում:
Նախարարի խոսքով՝ դրանք Մեծ Բրիտանիայում մշակված մեթոդներով ակումբներ կլինեն, որտեղ ուսուցիչները կվերապատրաստվեն։ Օտար լեզուների, ինչպես և մնացած բոլոր առարկաների դասավանդման մակարդակը, ըստ Հարությունյանի, Հայաստանում այնքան էլ բարձր չէ։
«Ակումբներում ուսուցումը զարգացած ու հղկված դասավանդման մեթոդներով կլինի, ապա ակումբներից կտեղափոխվեն դասարան»,- տեղեկացրեց նախարարը:
Մեկնաբանելով դպրոցական առարկայացանկից շախմատը հանելու մասին լուրերը՝ Արայիկ Հարությունյանը վստահեցրեց, որ առարկան ոչ թե ամբողջությամբ դուրս է գալու, այլ պարզապես վերանայվելու է:
Նելլի Մելքոնյան
