18.12.2025 | 23:24
ՀՀ տարածքում ավտոճանապարհները հիմնականում անցանելի են
Մեր կառավարությունը խնդիր ունի ստեղծել արդյունք ու հասցնել ամեն շահառուի. Տիգրան Ավինյան. ՏԵՍԱՆՅՈՒԹ
Տնտեսություն
30.01.2019 | 11:45
«Հայաստանում մետաղական հանքարդյունաբերության ոլորտը գտնվել է հասարակության ուշադրության կենտրոնում՝ հաշվի առնելով երկրի տնտեսության մեջ վերջինիս դերը։ Հայաստանը միացել է բնական պաշարներով հարուստ 50 երկիր միավորող «Արդյունահանող ճյուղերի թափանցիկության նախաձեռնությանը», որտեղ կիսում են արդյունահանող ոլորտի բաց, հաշվետու և թափանցիկ կառավարելու տեսլականը»,- ելույթ ունենալով Հայաստանի Հանրապետության «Արդյունահանող ճյուղերի թափանցիկության նախաձեռնության» առաջին ազգային զեկույցին նվիրված համաժողովում, ասաց Հայաստանի փոխվարչապետ Տիգրան Ավինյանը։
Ստեղծվել է Հայաստանի վերաբերյալ զեկույցը, որը ներկայացնում է Հայաստանում 2016-2017 թվականներին մետաղական հանքարդյունաբերության ոլորտի գործունեությունը։ Հրապարակվել են 2018 թվականին օգտակար հանածոների արդյունահանման նպատակով կնքված ընդերքօգտագործման բոլոր պայմանագրերը, որոնք, ըստ պարոն Ավինյանի, մինչ այդ հասանելի չեն եղել հասարակությանը։
Կառավարությունը հավանություն է տվել հանքարդյունաբերության ոլորտում իրական սեփականատերերի բացահայտումը կարգավորող օրենքների նախագծերի փաթեթին, որոնք Ավինյանի հավաստմամբ՝ կընդունվեն խորհրդարանի կողմից:
«Մեր կառավարությունը խնդիր և նպատակ ունի ոչ միայն արդյունքներ արձանագրել, այլ նաև դրանք մատչելի ձևով հասցնել ամեն շահառուի՝ լինի դա հեռավոր ազդակիր համայնքի բնակիչ, գիտաշխատող, գործարար, թե պետական ծառայող։ Միայն այս կերպ հնարավոր կլինի ունենալ տեղեկացված հանրային բանավեճ և ունենալ իրական փոփոխություններ»,- ասաց Տիգրան Ավինյանը։
Ռոբերտ Անանյան
