Ուսուցչի վարքականոնները թեժացնելու են խնդիրները ուսուցչական կոլեկտիվներում․ Կրթական քաղաքացիական նախաձեռնության անդամ․ ՏԵՍԱՆՅՈՒԹ

Կրթական քաղաքացիական նախաձեռնության անդամ Զեմֆիրա Քալաշյանի համոզմամբ՝ Կրթության և գիտության նախարարության կողմից ներկայացված ուսուցչի էթիկայի նորմերը կամ ուսուցչի վարքականոնը չի ծառայելու իր նպատակին։

Քալաշյանը նշում է, որ մենք կրթության ոլորտում ունենք բազմաթիվ օրենքներ, նախագծեր, որոնք գրված են, սակայն կիրառություն չեն ստացել։

«Որքանո՞վ է այս նախագիծը իրական և որքանո՞վ է այն բարձրացնելու կրթության որակը։ Ես վստահ եմ, որ այն որևէ արդյունավետություն չի ունենալու, որովետև ուսուցչական կոլեկտիվները չեն խոսելու իրենց ներսում խնդիրների մասին։  Որքան էլ ուսուցիչը բացասական բան անի, կոլեկտիվը չի խոսելու այդ մասին, իսկ այս նախագիծը դառնալու է միջոց այդ խնդիրներն ավելի թեժացնելու համար»,- այսօր «ԿԳՆ-ն կանոնակարգում է ուսուցչի վարքը․ ի՞նչ կարող է անել և ի՞նչ չի կարող անել մանկավարժը» թեմայով քննարկման ժամանակ ասաց Զեմֆիրա Քալաշյանը։

Վերջինս առաջարկում է ուսուցիչ-աշակերտ փոխհարաբերությունները կարգավորել «Հանրակրթության մասին» օրենքով, իսկ փոխարենը մտածել, թե ինչպես անել, որ կրթության որակն իրապես բարձրանա։

Զեմֆիրա Քալաշյանը նշեց, որ բազմիցս լսել է, որ մանկավարժական կրթություն տվող շատ բուհեր չեն ապահովում կրթության բարձր որակ, իսկ մի շարք գյուղական բնակավայրերում էլ կան առարկաներ, որոնք դասավանդող ուսուցիչներ չունեն և հորդորեց այս խնդիրների վերացման ուղղությամբ մտածել։

Մանրամասները՝ տեսանյութում։