12.01.2026 | 01:05
«Բարսելոնան» հաղթեց «Ռեալին» ու դարձավ Իսպանիայի սուպերգավաթակիր․ ՏԵՍԱՆՅՈՒԹ
Մարզպետարանների աշխատակիցների թիվը պետք է պակասի, օպտիմալացման նախագիծը շուտով կլինի. Սուրեն Պապիկյան
Տնտեսություն
17.01.2019 | 20:43
Այս փուլում քննարկվում է մարզպետարանների օպտիմալացման հարցը, շուտով նախագիծը կլինի: Այս մասին Factor.am-ի հետ զրույցում ասաց ՀՀ տարածքային կառավարման և զարգացման նախարարի պաշտոնակատար Սուրեն Պապիկյանը:
«Ավելի արդյունավետ կառավարում է լինելու: Կրճատվողների մասին թվեր չեմ կարող ասել, քանի որ դա կախված է մարզի բնակչության թվաքանակից, մարզպետարանի աշխատակիցների քանակից և նրանց գործառույթներից: Սրան զուգահեռ՝ չի բացառվում, որ հիմա մարզպետարանները կստանձնեն գործառույթներ, որոնք նախկինում չեն ունեցել: Միևնույն է՝ մարզպտարանների աշխատակիցների թիվը պետք է պակասի, և գործառույթներն ավելի հստակ դառնան»,- ասաց նախարարի պաշտոնակատարը:
Սուրեն Պապիկյանի խոսքով՝ քննարկվելու է մարզպետների տեղակալների թվի հարցը: Այս պահին յուրաքանչյուր մարզպետ ունի երեք տեղակալ. «Դա այս պահին քննարկման նյութ է, որն ընթացքում հասանելի կդառնա»:
Factor.am-ի հարցին՝ հատկապես ո՞ր մարզպետարանների աշխատակազմերն են ուռճացված, Սուրեն Պապիկյանը պատասխանեց. «Բոլորն էլ ուռճացված են: Չենք կարող նշել, որ մի մարզում ավելի ուռճացված է, իսկ մյուսներում՝ ավելի պակաս: Խնդիրը միայն արհեստական աշխատակազմը չէ: Այն աշխատանքը, որը կարող են անել 2-3 հոգով, անում են 5-6 հոգով: Մենք հիմա յուրաքանչյուր օղակ ուսումնասիրում ենք, խնդիրները տեսնում ենք: Համագործակցում ենք նաև միջազգային կառույցների հետ, որպեսզի օպտիմալացումը լինի ճիշտ ու նպատակային»:
Սուրեն Պապիկյանը, միաժամանակ, բացառեց մարզպետարանների միավորման տարբերակը:
Այս պահին շրջանառվում է կառավարության կառուցվածքում փոփոխություններ կատարելու նախագիծը, որի համաձայն՝ 17 նախարարությունները դառնում են 12: Կրճատվում է նաև առաջին փոխվարչապետի պաշտոնը:
Նախագծով նախատեսվում է ունենալ հետևյալ նախարարությունները՝
- աշխատանքի և սոցիալական հարցերի նախարարություն
- առողջապահության նախարարություն
- արդարադատության նախարարություն
- արտակարգ իրավիճակների նախարարություն
- արտաքին գործերի նախարարություն
- բնապահպանության նախարարություն
- կրթության, գիտության, մշակույթի և սպորտի նախարարություն
- պաշտպանության նախարարություն
- տարածքային կառավարման և ենթակառուցվածքների նախարարություն
- բարձր տեխնոլոգիաների և ռազմարդյունաբերության նախարարություն
- տնտեսական զարգացման և գյուղատնտեսության նախարարություն
- ֆինանսների նախարարություն
Փաստորեն, նախագծի համաձայն, տարածքային կառավարման և զարգացման նախարարությունը, պետական գույքի կառավարման կոմիտեն, ջրային կոմիտեն միավորվում են էներգետիկ ենթակառուցվածքների և բնական պաշարների նախարարությանը, իսկ էներգետիկ ենթակառուցվածքների և բնական պաշարների նախարարությունը վերանվանվում է տարածքային կառավարման և ենթակառուցվածքների նախարարություն:
Կրթության և գիտության, մշակույթի, սպորտի և երիտասարդության հարցերի նախարարությունների միավորումից էլ ստեղծվելու է կրթության, գիտության, մշակույթի և սպորտի նախարարություն:
Գյուղատնտեսության նախարարությունը միավորվում է տնտեսական զարգացման և ներդրումների նախարարությանը. այն կոչվելու է տնտեսական զարգացման և գյուղատնտեսության նախարարություն:
Ռազմարդյունաբերական կոմիտեն միավորվելու է տրանսպորտի, կապի և ՏՏ նախարարությանը և կոչվելու է բարձր տեխնոլոգիաների և ռազմարդյունաբերական նախարարություն:
Սփյուռքի նախարարության գործունեությունը դադարեցվում է, իսկ կանոնադրության ուժը կորցրած է ճանաչվում:
Կառավարության կառուցվածքի փոփոխությունների վերջնական նախագիծը մի քանի օրից կքննարկվի ԱԺ-ում:
Հայկ Վարդանյան
