08.10.2026 | 19:13
ԱՄՆ-ը «երբեք թույլ չէր տա» Հունաստան-Թուրքիա հակամարտություն․ Ռուբիոն նշել է F-35-ների Անկարային փոխանցման պայմանը
Ի՞նչ հարցեր են ընդգրկված հունվարի 15-ին մեկնարկելիք ՀՅԴ Ընդհանուր ժողովի օրակարգում
Քաղաքականություն
14.01.2019 | 20:29
Հունվարի 15-ին մեկնարկում է ՀՅԴ-ի Ընդհանուր ժողովը: Ի դեպ՝ շուրջ երկու տասնամյակ հետո առաջին անգամ ՀՅԴ-ն իր այս հավաքն անցկացնում է արտահերթ խորհրդարանական ուժի կարգավիճակով:
ՀՅԴ անդամ Գեղամ Մանուկյանը Factor.am-ի հետ զրույցում ասաց, որ դա իրենց համար անսովոր չէ, քանի որ իրենց օրակարգային հարցերն այնքան շատ են ու բովանդակալից, որ «սովորական մարդու համար կարող են սարսափելի թվալ»: Լուրեր են պտտվում, որ այս ժողովի ժամանակ կարող է փոխվել ՀՅԴ ղեկավար մարմնի՝ Բյուրոյի ներկայացուցիչը: Հիշեցնենք, որ այդ պոստը երկար տարիներ զբաղեցնում է Հրանտ Մարգարյանը:
«ՀՅԴ օրակարգը մի քանի էջ ունի, և Բյուրոյի ընտրությունը վերջին կետն է: ՀՅԴ ժողովների ժամանակ շատ ավելի կարևոր են ռազմավարական և ազգային հարցերը։ Դրանից հետո նոր ընտրում ենք Բյուրոն, որի վրա էլ այդ աշխատանքի իրականացման պարտականությունն է դրվում»,- մեկնաբանեց Գեղամ Մանուկյանը:
Արտահերթ խորհրդարանական ընտրություններից հետո ո՞րն է ՀՅԴ-ի տեսլականը հարցին Գեղամ Մանուկյանը պատասխանեց. «Մեր բոլոր ժողովների տեսլականը միշտ ազատ, անկախ Հայաստանն է: Միացյալ հայրենիքում ազատ և անկախ պետություն և քաղաքացի ունենալն է»:
Նա նաև հավելեց, որ ժողովների ժամանակ մշակում են հինգ տարվա իրենց ռազմավարական ծրագիրը: Գեղամ Մանուկյանը, սակայն, չցանկացավ մանրամասնել, թե ՀՅԴ-ի արտերկրի կառույցներն ինչպե՞ս են գնահատում ՀՀ արտահերթ խորհրդարանական ընտրություններում իրենց պարտությունը: «ՀՅԴ-ի ամբողջ աշխարհի մեր ընկերների տեսակետներն ի վերջո ամփոփվելու են մեր ժողովի որոշումներում և գնահատականներում»,- ընդգծեց նա:
