10.06.2026 | 23:29
Հունիսի 7-ին կայացած ԱԺ ընտրությունները աննախադեպ էին. «Նոր ուժ»-ի հայտարարությունը
Ղազախստանի ՆԳՆ-ն մեկնաբանել է Կարագանդայի միջադեպի գործով կասկածվող Նարեկ Գուրուրյանի տեսաուղերձը
Հասարակություն
08.01.2019 | 12:51
Ղազախստանի ՆԳՆ-ն մեկնաբանել է Կարագանդայում տեղի ունեցած միջադեպի գործով հետախուզվող Նարեկ Գուրուրյանի ֆեյսբուքյան տեսաուղերձը: Այս մասին գրում է Tengrinews.kz-ն՝ վկայակոչելով ՆԳՆ ներքին և արտաքին հաղորդակցության դեպարտամենտի ղեկավար Ալմաս Սադուբաևին:
Երկրի իրավապահների տվյալներով՝ Կարագանդայում խուլիգանական գործողությունների և 23-ամյա տղամարդու սպանության կասկածանքով մինչ օրս 8 մարդ է ձերբակալվել, կասկածյալներից մեկի՝ քաղաքացի Գուրուրյանի նկատմամբ հետախուզում է հայտարարվել:
«Հետախուզական գործողությունների շրջանակում ոստիկանները շրջել են նրա հնարավոր գտնվելու վայրերով: Հանձնվելու պատրաստակամության մասին կասկածյալի՝ համացանցում հրապարակած ուղերձի հետ կապված երկու օր առաջ նրա հարազատներին են փոխանցվել մեր աշխատակիցների կոնտակտները, սակայն մինչ օրս ոչ ոք նրանց հետ կապ չի հաստատել»,- հայտնել է Սադուբաևը:
Նա նշել է, որ Ղազախստանի ՆԳՆ-ն երաշխավորում է գործի օբյեկտիվ, համակողմանի հետազոտությունը և «քաղաքացի Գուրուրյանին խորհուրդ է տալիս, ծանրացուցիչ հանգամանքներից խուսափելու համար, կամավոր հանձնվել ոստիկանության աշխատակիցներին»:
Հիշեցնենք, որ հունվարի 1-ի գիշերը Ղազախստանի Կարագանդա քաղաքի «Հին Հռոմ» ռեստորանում Ամանորը նշող հաճախորդների միջև ծեծկռտուք է տեղի ունեցել, ինչի հետևանքով 23-ամյա տղամարդ է սպանվել: Միջադեպից հետո քաղաքում լարված իրադրություն է ստեղծվել, ցույցեր են անցկացվել:
Factor.am-ի հետ զրույցում Կարագանդայի հայ համայնքի ղեկավար Արթուր Նավասարդյանը նշել է, որ լարվածությունն անհամեմատ թուլացել է, սակայն հայերին պատկանող օբյեկտների մոտ տեղի ոստիկանական ուժերը 24-ժամյա ռեժիմով հերթապահություն են իրականացնում:
