Առևտրի կենտրոններն ի՞նչ պայմաններ են առաջարկել ֆիրդուսցիներին. Տարոն Մարգարյանը խոստումը կկատարի՞

Ֆիրդուսի տոնավաճառի առևտրականների տեղափոխման նպատակով պայմանավորվածություններ են ձեռք բերվել «Ռոսիա», «Երևան», «Մալաթիա», «Հրազդան» և «Հայկական շուկա» տոնավաճառների հետ: Ի պատասպան Factor.am-ի հարցմանը` այս մասին հայտնել են Երևանի քաղաքապետարանից:

Հիշեցնենք՝ նշված առևտրի կենտրոններից «Ռոսիա» և «Երևան» տոնավաճառները պատկանում են «ՍԻԼ կոնցեռնի» հիմնադիր նախագահ Խաչատուր Սուքիասյանին, «Հրազդան» տոնավաճառի սեփականատերը հանդիսանում է Ազգային ժողովի նախկին պատգամավոր Աշոտ Աղաբաբյանը, իսկ «Մալաթիա» տոնավաճառը, համաձայն շրջանառվող լուրերի, պատկանում է ՀՀԿ-ական պատգամավոր, գործարար Սամվել Ալեքսանյանին: Ինչ վերաբերում է «Հայկական շուկա» տոնավաճառին, ապա այս շուկայի սեփականատիրոջ մասին որևէ բան հայտնի չէ, շուկայի մասին չեն լսել անգամ ֆիրդուսցիները:

Երևանի քաղաքապետարանից Factor.am-ին հայտնել են, որ տոնավաճառների պատասխանատուների հետ ձեռք բերված պայմանավորվածության համաձայն` Ֆիրդուսի շուկայից տեղափոխվողներին որոշակի ժամկետով արտոնություններ կտրամադրվեն: Ինչ վերաբերում է արտոնություններին, այդ թվում՝ վարձավճարի զեղչի հետ կապված, քաղաքապետարանից չեն մանրամասնել, փոխարենը մեզ հորդորել են դիմել տվյալ առևտրի կենտրոնի պատասխանատուին:

«Հրազդան» տոնավաճառի սեփականատեր Աշոտ Աղաբաբյանը Factor.am-ի հետ զրույցում տեղեկացրեց, որ տոնավաճառի տնօրինությունն արդեն նախնական պայմանավորվածություն ունի Ֆիրդուսի շուկայի՝ մոտ 30 առևտրականի հետ:

«Մենք այնպիսի պայմաններ ենք առաջարկել, որ ոչ մի տեղ չեն առաջարկի, այսինքն՝ ամսական վարձավճարը մեկ տաղավարի համար կազմում է 30 հազար դրամ, այդքանով մենք պատրաստ ենք իրենց ընդունել»,- նշեց Աղաբաբյանը՝ հավելելով, որ առևտրականները արտոնյալ պայմաններով աշխատելու հնարավորություն կստանան երկար ժամանակ՝ հատկապես եթե մեծ թվով առևտրականներ տեղափոխվեն «Հրազդան» տոնավաճառ:

Քաղաքապետարանի մատնանշած հաջորդ առևտրի կենտրոնում`«Երևան» տոնավաճառում, արդեն 10-15 ֆիրդուսցի է աշխատում, նրանց հետ ստորագրվել են պայմանագրեր: Տոնավաճառի տնօրեն Էդգար Առաքելյանը մեզ հետ զրույցում հայտնեց, որ նրանք 3 ամիս առանց վարձավճարի աշխատելու հնարավորություն են ստացել: «Էնպիսի պայմաններ ենք առաջարկել, որ մարդիկ կարողանան առաջիկա 6 ամիսը գրեթե անվճար աշխատել, այսինքն՝ 3 ամիսը անվճար, իսկ հաջորդ 3 ամիսը՝ 1քառակուս մետրը տրվելու է 1 000 դրամով»,- նշեց «Երևան» տոնավաճառի տնօրենը:

Մյուս երեք՝ «Մալաթիա» , «Ռոսիա» և «Հայկական շուկա» տոնավաճառների տնօրինության հետ կապ հաստատել չհաջողվեց:

Նկատենք` քաղաքապետարանից մեզ հայտնել են, որ առաջարկվող պայմաններին համաձայնել և այլ վաճառատեղեր են տեղախոխվել 20-25 առևտրական, այս թիվը, մինչդեռ, չի համընկնում առևտրի կենտրոններից մեզ հայտնած թվերի հետ:

Հետաքրքիր է նաև այն, որ Ֆիրդուսի տոնավաճառի տաղավարներն ապամոնտաժելուց հետո անցել է մոտ 10 օր, սակայն շինարարական աշխատանքներն այնտեղ չեն մեկնարկել:

Հավելենք՝ քաղաքապետարանից մեզ հայտնել են, որ Երևանի 33-րդ թաղամասի Տ. Մեծի պողոտա 7/1 հասցեում գտնվող անշարժ գույքը ընդհանուր բաժնային սեփականության իրավունքով պատկանում է «Սիթի Սենթր Դիվելըփմենթ» ՓԲԸ-ին, «Մանազկերտ Քոնսթրաքշն» ՍՊԸ-ին, «Կարս Քոնսթրաքշն» ՍՊԸ-ին և «Էլիտ Հոլդինգ» ՍՊԸ-ին:

Շողիկ Գալստյան