28.09.2026 | 16:43
Ռուբինյանի գլխավորած պատվիրակությունը կմեկնի Հռոմ
Ենթակայանը հրդեհից հետո դեռ ծխում է․ քրեական վարույթ է հարուցվել․ ՏԵՍԱՆՅՈՒԹ
28.09.2026 | 16:22
«Ծիծեռնակաբերդ» 110/6 կՎ ենթակայանում փրկարարները շարունակում են աշխատել՝ հովացման աշխատանքներ կատարելով։ Factor TV-ն ֆիքսել է, թե ինչ է կատարվում ենթակայանի տարածքում՝ երեկ այնտեղ բռնկված հրդեհից հետո։ ՆԳՆ մամուլի խոսնակ Նարեկ Սարգսյանը հայտնել էր, որ հրդեհից հետո տարածքում հերթապահություն է իրականացվելու։
Հիշեցնենք՝ սեպտեմբերի 27-ին՝ ժամը 17։07-ին, ՆԳՆ 112 օպերատիվ կառավարման կենտրոն ահազանգ էր ստացվել, որ Երևանի Ծիծեռնակաբերդի խճուղում գտնվող էլեկտրական ենթակայանում հրդեհ է բռնկվել։
Ժամը 20։10-ի դրությամբ հրդեհը մեկուսացվել էր։ Հրդեհաշիջման աշխատանքների ընթացքում երկու փրկարար ծխահարվել էին․ նրանցից մեկը հոսպիտալացվել էր, մյուսին տեղում բուժօգնություն էր ցուցաբերվել։
Փրկարարների օպերատիվ գործողությունների արդյունքում հրդեհը ժամը 21։10-ին մարվել էր, իսկ տարածքում սահմանվել էր հերթապահություն։
ՆԳՆ խոսնակի փոխանցմամբ՝ հրդեհը բռնկվել էր ենթակայանի տրանսֆորմատորներից մեկում, որում եղել է մոտ 20-ից 30 տոննա յուղ։
Դեպքի առթիվ նախաձեռնվել է քրեական վարույթ՝ առանձնապես խոշոր չափերի գույքային վնաս պատճառելու հատկանիշներով։ Քննչական կոմիտեի փոխանցմամբ՝ ձևավորվել է քննչական խումբ, կատարվում են անհրաժեշտ քննչական և վարութային գործողություններ։
Մանրամասները՝ տեսանյութում։
Անի Թամրազյան
