06.11.2026 | 01:59
Եվրոպա լիգա. «Արարատ-Արմենիան» ցավալի պարտություն կրեց Պորտուգալիայում. ՏԵՍԱՆՅՈՒԹ
«Հրազդան» մարզադաշտը կվերանորոգվի. Կառավարությունը 600 մլն դրամ է հատկացնում
Տնտեսություն
24.09.2026 | 14:56
Կառավարությունը 600 մլն դրամ է հատկացնում «Հրազդան» մարզադաշտի վազքուղու և անհրաժեշտ ենթակառուցվածքների վերակառուցման ու վերանորոգման աշխատանքների համար։ Որոշումն ընդունվել է սեպտեմբերի 24-ի կառավարության նիստում։
Գումարը վերաբաշխվելու է ՀՀ 2026 թվականի պետական բյուջեով ԿԳՄՍ նախարարությանը հատկացված միջոցների շրջանակում։ Այն նախատեսվում է ուղղել միջազգային չափանիշներին համապատասխան թեթև աթլետիկայի և պարաաթլետիկայի մրցումներ անցկացնելու համար անհրաժեշտ վազքուղու և ենթակառուցվածքների, ինչպես նաև մարզումային մարզադաշտի աթլետիկական վազքուղու վերակառուցման և վերանորոգման աշխատանքներին։
Աշխատանքների անհրաժեշտությունը կապված է 2027 թվականին Հայաստանում անցկացվելիք Ֆրանկոֆոնիայի խաղերի հետ։ Խաղերը նախատեսված են հուլիսի 23-ից օգոստոսի 1-ը։
Կառավարության հիմնավորման համաձայն՝ «Հրազդան» մարզադաշտի աշխատանքները փոխկապակցված և հաջորդական փուլեր են ենթադրում, և դրանցից որևէ մեկի ուշացումը կարող է վտանգել օբյեկտը սահմանված ժամկետում պատրաստելու հնարավորությունը։ Այդ պատճառով աշխատանքների գնման պահանջը համարվել է հրատապ, և նախատեսվում է կիրառել «հրատապ մեկ անձից» գնման ընթացակարգ։
Հատկանշական է, որ հիմնավորման մեջ արդեն նշված է նաև նախատեսվող կապալառուն՝ «Ջի Թի Էս Քնսթրաքշն» ՍՊԸ-ն։
Ըստ կառավարության ներկայացրած հիմնավորման՝ ընկերությունը ներկայում իրականացնում է Արթուր Աբրահամի անվան մարզական համալիրի շինարարությունը։ Միաժամանակ, 600 մլն դրամի աշխատանքների ամբողջ ծավալը չի ներառելու վազքուղու ռետինե ծածկի և դրա տեղադրման համար անհրաժեշտ ստորին շերտերի՝ այդ թվում ասֆալտե կամ բետոնե ծածկի աշխատանքները։
Դրանք նախատեսվում է իրականացնել այլ կազմակերպության կողմից՝ առանձին գնման ընթացակարգով։ Կառավարությունը դա հիմնավորում է նրանով, որ վազքուղու վերջնական ծածկի ընտրությունը տեխնոլոգիապես կապված է համապատասխան արտադրողի, մատակարարի և մասնագիտացված կազմակերպության ընտրության հետ։
Հիմնավորման համաձայն՝ այդ աշխատանքների իրականացման համար կարող է անհրաժեշտ լինել արտասահմանյան արտադրողների, մատակարարների և մասնագիտացված կազմակերպությունների ներգրավում։
Ուշագրավ է նաև, որ կառավարության հիմնավորման համաձայն՝ պետական բյուջեից ներդրումներ են կատարվում մասնավոր սեփականություն հանդիսացող ենթակառուցվածքի բարելավման համար։ Դրա դիմաց նախատեսվում է առաջիկա մոտ 20 տարվա ընթացքում «Հրազդան» մարզադաշտն օգտագործել պետական ծրագրերի իրականացման համար։
Նարեկ Կիրակոսյան
