02.11.2026 | 10:11
ՀՀ տարածքում ավտոճանապարհներն անցանելի են
Գյուղատնտեսության ոլորտում աճ չունենք, նվազում ունենք. Նիկոլ Փաշինյան․ ՏԵՍԱՆՅՈՒԹ
Տնտեսություն
16.09.2026 | 17:20
Ազգային ժողովում Կառավարության հետ հարցուպատասխանի ժամանակ ՀՀ վարչապետ Նիկոլ Փաշինյանն անդրադարձավ գյուղատնտեսության ոլորտի ընթացիկ ցուցանիշներին՝ ընդունելով, որ այս տարի ոլորտում աճի փոխարեն արձանագրվել է անկում։
«Ուժեղ Հայաստան» խմբակցության ղեկավար Նարեկ Կարապետյանը վարչապետից հետաքրքրվեց, թե տարեսկզբից ի վեր ինչքան է աճել Հայաստանի գյուղատնտեսությունը։
«Մենք վիճակագրության տվյալներով, եթե չեմ սխալվում, գյուղատնտեսության ոլորտում աճ չունենք այս տարի, ընդհակառակը՝ ունենք նվազում: Եվ կարող եմ ասել, որ դա անսպասելի չէ մի քանի պատճառներով»,- պատասխանեց Փաշինյանը:
Վարչապետի պարզաբանմամբ՝ կառավարության ծրագրով գյուղատնտեսության ապագան դիտարկվում է բացառապես ինտենսիվ զարգացման համատեքստում։
«Գյուղատնտեսվարման այն ձևերը, որոնք այսօր լայնորեն կիրառվում են, դրանք այլևս գյուղատնտեսություն չեն, և դրանք երբեք չեն աճելու: Դրանց աճի ուղղությամբ ջանքեր գործադրելը կնշանակի երկիրը դատապարտել չզարգացող ուղու: Մենք պետք է զարգացնենք ինտենսիվ գյուղատնտեսությունը և դիվերսիֆիկացնենք շուկաները, քանի որ որևէ կետից անհամաչափ կախվածությունը զրկում է ոլորտը կառավարելու հնարավորությունից»,- ասաց վարչապետը:
Արձագանքելով՝ Նարեկ Կարապետյանը նշեց, որ Հայաստանի գյուղերում ապրում է գրեթե մեկ միլիոն մարդ՝ երկրի յուրաքանչյուր երրորդ քաղաքացին, և հետաքրքրվեց անկման կոնկրետ տոկոսով։ Ի պատասխան՝ Նիկոլ Փաշինյանը նշեց, որ տարին դեռ չի ավարտվել, և վիճակագրությունն ունի իր մեթոդաբանությունը։
Նա շեշտեց, որ 2018 թվականից ի վեր պետությունը հարյուր միլիոնավոր դոլարների աջակցություն է ցուցաբերել գյուղացիական տնտեսություններին և վստահություն հայտնեց, որ կառավարության որդեգրած ռազմավարությունն ի վերջո լուծելու է գյուղի ու գյուղատնտեսության առջև ծառացած խնդիրները։
Մանրամասները՝ տեսանյութում։
Անի Թամրազյան
