Մարդիկ մեզ ասում էին՝ ինչ անենք, որ ՀՀԿ-ականները լռեն․ Հայկ Կոնջորյան. ՏԵՍԱՆՅՈՒԹ

Factor.am-ի զրուցակիցն է «Իմ քայլը» դաշինքի պատգամավորի թեկնածու Հայկ Կոնջորյանը

-Պարոն Կոնջորյան, քարոզարշավը մոտենում է ավարտին,  հասցրեցի՞ք այս կարճ ժամանակահատվածում  հանրությանը հասցնել Ձեր ասելիքը՝ ոչ թե այն հայտարարությունների մակարդակով, որոնք հեղափոխությունից հետո անընդհատ եղել են՝ նկատի ունեմ նախկին իշխանություններին ուղղված քննադատությունը, այլ ձեր ապագա անելիքների ու ծրագրային դրույթների մատուցման հետ կապված։

-Կարճ ժամանակամիջոցում մենք կարողացանք մեր ուժերի հնարավորությունների սահմաններում մաքսիմալ հանդիպել ընտրողներին։ Առավոտից երեկո շրջել ենք փողոցներով, բակերով, գնացել ենք տնետուն, ներկայացրել մեր գաղափարը, տեսլականը։ Երբ համեմատում եմ նախորդ տարվա հետ, նախորդ տարի շատերի մոտ գերակշռող էր այն մոտեցումը, որ մեկ է բան չի փոխվելու, մենք պայքարում էինք նաև հենց այդ հուսալքության դեմ։ Հիմա մարդկանց մոտ այդ հոգեբանական պատկերն այլ է, մարդիկ ասում են, որ իրենք գիտեն, որ լավ է լինելու։ Մեկ տարվա մեջ նման ռադիկալ փոփոխությունը շատ հուսադրող է։

-Ձեր կարծիքով ընտրողը «Իմ քայլը» դաշինքի կողմից գաղափարական քարոզարշավ տեսա՞վ։

-Մենք հնարավորինս փորձեցինք ժողովրդին ներկայացնել մեր գաղափարներն ու ծրագրերը։ Այս 12 օրերի ընթացքում որքանով եղավ գաղափարական՝ չեմ կարող ասել, բայց, կարծում եմ, քարոզարշավի ընդհանուր տրամաբանությունը շատ բնական է և նորմալ, որովհետև տեղի է ունեցել հեղափոխություն, և ըստ էության, ընտրություններում ժողովրդի հիմնական կողմնարոշիչը հեղափոխությունն ու նրա առաջնորդ են ու հեղափոխության նպատակները։

– Դուք մեղադրում եք ՀՀԿ-ին, որ իրենց քարոզարշավն ամբողջությամբ հիմնված էր Ձեր արածների, Փաշինյանի հայտարարությունների վրա, բայց արդյոք Ձեր քարոզարշավը առավելապես հենց ՀՀԿ-ին հակադարձելով չանցա՞վ։

-Եթե նայենք ՀՀԿ-ի քարոզարշավի տրամաբանությունը, ապա ամբողջ ռազմավարությունը կազմվել է հենց դրա վրա, որքանով հնարավոր է սուր քննադատել իշխանությանը, ընդ որում՝ շատ հաճախ մանիպուլատիվ գաղափարների շնորհիվ, որպեսզի, իրենց տրամաբանությամբ, հնարավոր լինի իրենց կողմ քաշել ընտրողների որոշակի թիվ։

Սևի ու սպիտակի տրամաբանության մեջ իրենք իրենց դրել էին հակաբևեռի տեղ։ Որքանով էր դա արդյունավետ՝ ցույց կտան ընտրությունների արդյունքները։

Բայց երբ մենք շրջում էինք ու քաղաքացիների հետ զրուցում, նրանցից շատ շատերից եմ ստացել կարծիք, որ «ի՞նչ անենք, որ ՀՀԿ-ականները լռեն»։ Մարդիկ չեն էլ ցանկանում լսել նրանց։

– Ձեր նախկին կուսակցության անդամները, խոսքը «Լուսավոր Հայաստանի» մասին է, հայտարարում են, որ իրենք խորհրդարանում լինելու են երկրորդ քաղաքական ուժը։ Եթե ԼՀԿ-ն անցնի խորհրդարան, դիսկոմֆորտ չե՞ք զգալու ձեր նախկին գործընկերների հետ աշխատելիս։

–Ոչ, բացարձակ դիսկոմֆորտ չի լինի, ես քաղաքական գործիչ եմ, և քաղաքականությունն ինձ համար գաղափարների շփման դաշտ է, և ես փորձելու եմ կյանքի կոչել իմ և իմ թիմի գաղափարները։

-ԼՀԿ-ում Ձեզ ներեցի՞ն ճամբարափոխության համար։

-Ես Ձեզ հետ համամիտ չեմ, ներում են, երբ ինչ-որ մեկն անում է սխալ, եթե չի արվում սխալ՝ ուրեմն  ներելու մասին խոսք լինել չի կարող։

Մանրամասները՝ տեսանյութում։

Լիլիթ Շաբոյան