«Հայաստանցու փիլիսոփայությամբ չենք մտածում, այլ՝ եվրոպացու». երեք վարչապետ «փոխած» գործարար

Գյումրիի «Սաստեքս» տեքստիլ գործարանն այս պահին 180 աշխատող ունի։ Վարչապետի պաշտոնակատար Նիկոլ Փաշինյանն այսօր մասնակցեց նոր արտադրամասի շենքի բացմանը։ Գործարանի ղեկավար Քրիստիան Գելիջին Factor.am-ի հետ զրույցում ասում է, որ ձեռնարկության աշխատակիցները մինիմալ աշխատավարձ են ստանում՝ 55 000 դրամ. «Քանի որ այս մարդիկ կյանքում այս գործը չեն արել»։

Ընկերությունը իրացման խնդիր չունի։ Եվրոպական 7 երկրի հետ հագուստի մատակարարման 1-2 միլիոն դոլարի պայմանագիր ունեն։ Գելիջին խոստանում է՝ հաջորդ տարվա ապրիլին նոր արտադրամաս բացել Վանաձորում, ինչպես և Գյումրիում կգործի նոր արտադրամաս՝ 180 աշխատատեղով։

Պարոն Գելիջին համառորեն չբացահայտեց, թե որքան գումար է ներդրել տեքստիլ ձեռնարկություններ բացելիս. «Մենք 1 դրամ չենք ներդրել, կյանք ենք ներդրել, կյանք։ Ես իմ առողջությունն եմ ներդրել, փողով չեք հաշվի։ Մենք հայաստանցու փիլիսոփայությամբ չենք եկել էստեղ, մենք եկել ենք եվրոպական մտածելակերպով»։

«Սաստեքս» տեքստիլ գործարանի բացումը չորս տարի ձգձգվում էր։ 2014 թվականից բացում էր այդ ժամանակների վարչապետ Հովիկ Աբրահամյանը, իսկ 2017 թվականին այդ արտադրամասի շահագործման մասին ակտիվ խոստումներ էր տալիս վարչապետ Կարեն Կարապետյանը: Վարչապետի պաշտոնակատար Նիկոլ Փաշինյանը երրորդն է, որ ոտք է դնում այստեղ։

Factor.am-ի հարցին՝ ի՞նչ խոչընդոտներ կային գործարարի առաջ, Քրիստիան Գելիջին պատասխանեց. «Դա մեզ համար չէր խնդիր, դա երկրի խնդիրն է։ Եթե մի երկրում 3 տարվա մեջ 3 վարչապետ այստեղ ընդունենք, դուք պետք է հասկանաք, որ մեր երկիրը անստաբիլ է»։

Նախկին իշխանությունը մասնաբաժի՞ն էր պահանջում գործարարից, Գելիջին հերքեց. «Քանի որ ես սասունցի եմ, սկզբից իմ դիրքերն այստեղ ճիշտ եմ դրել։ Որևէ ոստիկանի կամ պետական աշխատողի մի կոպեկ չեմ տվել, և շանս չեմ տվել, որ ինձնից ուզեն։ Իմ արած գործը սուրբ գործ է, ես էստեղ փող չեմ աշխատում»։

Կարդացեք նաև թեմային առնչվող՝ «Փաշինյանի նշած՝ Գյումրիում բացվելիք կարի արտադրամասը 2017-ին «մասնակցում» էր ՀՀԿ-ի քարոզարշավին. այն բացվում է Հովիկ Աբրահամյանի ժամանակներից»  անդրադարձը: