15.12.2025 | 16:34
Էդուարդ Սպերցյանը հավակնում է լավագույն ֆուտբոլիստի կոչմանը
«Սասնա ծռերի» թեկնածուն բացատրություն է պահանջում «Սասնա ծռերից»
Քաղաքականություն
07.12.2018 | 13:25
«Սասնա ծռեր» կուսակցության պատգամավորության թեկնածու Լիանա Ստեփանյանը հայտարարություն է տարածել՝ պահանջելով բացատրություն հարազատ կուսակցության քարտուղարությունից։
«Հարգելի լրատվականներ,
Արձագանքելով ձեր կողմից ինձ ուղղված հարցմանը՝ տալ մեկնաբանություն «Սասնա Ծռեր» համահայկական կուսակցության կողմից արված հայտարարությանն առ այն, որ՝ «Սասնա Ծռեր համահայկական կուսակցության պատգամավորության թեկնածու Լիանա Ստեփանյանի հետ առաջացել են անհամատեղելի մոտեցումներ։ Նման պարագայում Կուսակցության քարտուղարությունը իրավիճակի հանգուցալուծումը տեսնում է նրա կողմից ինքնաբացարկ հայտնելու ձևով։»,
Հայտնում եմ, որ ինքս եմ ցանկանում ստանալ հրապարակային բացատրություն, մեկնաբանություն Սասնա Ծռեր համահայկական կուսակցության Քարտուղարությունից` արված հայտարարության վերաբերյալ: Նշեմ, որ անձամբ ինձ հետ քարտուղարությունը չի ունեցել զրույց այն մասին, որ մեր միջև կա մոտեցումների անհամատեղելիություն: Կարծում եմ՝ այս հայտարարության հիմքում ընկած է տարրական թյուրըմբռնում:
Լիահույս եմ, որ Սասնա Ծռեր համահայկական կուսակցության Քարտուղարությունը կտա սպառիչ բացատրություն, որով կհաստատի այն, որ «Սասնա Ծռեր» համահայկական կուսակցությունը, որի հիմնադիր անդամն եմ հանդիսանում ես՝ Լիանա Սամվելի Ստեփանյանս, հիրավի հանդիսանում է արդարության, ժողովրդավարության, ազնվության, բազմակարծության, լայնախոհության, իրավունքի գերակայության, օրինապահության, հանդուրժողականության սկզբունքների կրողն ու իրացնողը», – ասված է հայտարարության մեջ:
Հիշեցնենք, որ «Սասնա Ծռեր» կուսակցությունը հայտարարություն էր տարածել, որտեղ ասվում էր, որ «պատգամավորության թեկնածու Լիանա Ստեփանյանի հետ առաջացել են անհամատեղելի մոտեցումներ, հանգուցալուծումը տեսնում ենք նրա կողմից ինքնաբացարկ հայտնելու ձևով»:
